Велешани ја уништуваат урбаната опрема, за неколку дена скршено седечкото мало фудбалче во Младински парк

Седечкото мало фудбалче во Младински парк, поставено пред четири дена, целосно е искршено од страна на несовесни граѓани. Новата забавна содржина за најмладите којашто имаше за цел да биде катче за безброј убави моменти поминати во дружење и забава, денеска, стои скршена и не употреблива.

Градоначалникот на Општина Велес, Марко Колев, преку својот фејсбук профил ги охрабри граѓаните коишто ќе забележат вандалско однесување истото да го пријават во општината или до надлежните институции.

– Најостро го осудувам ваквото однесување и уништување на урбаната опрема и апелирам на разум и одговорност кон околината, зашто само така може да придонесеме за создавање на нови катчиња во градот, пишува во соопштението на Колев.

Исто така, за неполна седмица, вандализам е извршен на повеќе локации. Покрај малото седечко фудбалче, оштетени и скршени биле голем број корпи за отпадоци во центарот на градот.

Од Јавното комунално претпријатие „Дервен“ известуваат дека уништени се и пет летниковци поставени на Езеро Младост и украдени се неколку прскачи за наводнување.

Се апелира до сите велешани, да ја чуваат урбаната опрема бидејќи истата се поставува во нивна корист и доколку забележат вандалско однесување истото веднаш да го пријават во Општина Велес или надлежните институции.

Стефани Манева