„Велес бајкинг“ одбележува децениски јубилеј, одржана турата „Велес мтб тоур 2023“ со хуманитарен карактер

Изминатиот викенд се одржа јубилејната 10-та по ред Рекреативна велосипедска тура „Велес мтб тоур 2023“ со којашто се одбележа првиот организиран велосипедски настан во градот. Во трката учество земаа над 250 велосипедисти и 20 планинари. Станува збор за традиционален велосипедски настан кој веќе е препознатлив бренд за рекреативниот велосипедизам како во Велес така и на територија на Македонија. За него секоја година има се поголем интерес и се зголемува бројот на учесници велосипедисти, рече Зоран Јаневски претседател на ЗГ„Велес бајкинг“.

„Стартот на турата беше во неделата, на 8 октомври, во 10:00 часот од винарија Шато Сопот. Се возеше низ неколку велешки села и населени места. Велосипедистите својјата најголема авантура и  адреналин го почувствуваа при поминување на „дрвениот“ мост на реката Вардар во близина на село Сопот. Потоа патеката ги водеше низ селата Белештевица,Раштани и  Башино Село. Рутата на патеката поминуваше и покрај велешка Топилница, симболот на 30 децениското загадување на велешани со тешки метали, за потоа велосипедистите да возат кон целта поточно винарија „Шато Сопот“. Бидејќи велосипедскиот настан се одржа во рамките на програмата на Фестивалот на велешка пита и вино „ПИТИЈАДА 2023“  сите уесници на рекреативната велосипедска тура имаа можност да ја вкусат надалеку познатата „Велешка пита пастрмалија“ и да вкусат чаша квалитетно вино од винаријата Шато Сопот Македонија,“ додаде Јаневски.

Тоа што остави впечаток на годинешното одржување на „Велес мтб тоур 2023“  е хуманитарниот карактер на велосипедската тура.  „Велес бајкинг“ заедно со сите велосипедисти учесници собираа финансиски средства за купување на велосипед за млад триатлонец од Скопје кој за жал нема можности за изведување на редовни и квалитетни тренинзи иако покажува завидни резултати како државно така и на меѓународно ниво.

Убавка Јаневска