Пендаровски: Против насилството заеднички треба да се бориме секој ден!
25.11.2020
Од денеска започнува меѓународната кампања „16 дена активизам против родово базираното насилство“, токму на Меѓународниот ден за борба против насилството врз жените, а ќе трае до 10 декември, Денот на човековите права. Годинава, Северна Македонија го одбележува овој ден со наговестувањата за промени, кои треба да ги донесе новиот Закон против насилство врз жените и семејното насилство.
По овој повод, со девизата #16ДенаАктивизам, Претседателот Стево Пендаровски упати видео порака до граѓаните, додека пак претседателската вила синоќа беше осветлена во портокалово.
-Сè поголемиот број на жени и деца, жртви на семејно и родово базирано насилство во текот на пандемијата, е последниот сигнал дека е потребен побрз одговор од институциите, сеопфатна стратегија и поддршка на жртвите на насилство.Истовремено, должни сме како луѓе, насилството да го пријавиме и да им помогнеме на жртвите. И не само денеска, на Меѓународниот Ден за борба против насилство врз жените и девојчињата и родово базирано насилство или во следните #16ДенаАктивизам. Против насилството заеднички треба да се бориме секој ден!, вели во својата честитка Пендаровски.
Мите Јаначков
