ЦЕФТА одлучува дали Македонија го прекршува договорот со Србија
Објавено: 22 јули, 2013, во 07:26 часот
Заедничкиот комитет на Цефта денеска на вонредениот состанок во Белград ќе одлучи дали Македонија, со мерката за условен увоз на српска пченица и брашно, ги прекршува одредбите од договорот.
Српското министерство за земјоделство очекува ЦЕФТА да упати официјално барање до македонската влада, за укинување на мерката која го ограничува увозот на пченица и брашно од Србија.
Државниот секретар Данило Голубовиќ изјави дека се договориле со македонското министерство мерката за пченицата да се укине до 15 август, а за брашното до 1 септември. Доколку тоа не се случи, Србија се закануваше дека ќе го ограничи увозот на македонско вино и домати.
Според Голубовиќ добиле ветување дека ако во иднина некоја земја неколку години по ред воведува мерки како Македонија и ги прекршува правилата на ЦЕФТА, засегнатата држава има право веднаш да воведе реципрочни мерки, без да бара дозвола од ЦЕФТА.