Гастро речник!

Понекогаш и искусните домаќинки се збунети со упатствата во готварските книги. Затоа, еве кратки објаснувања на некои поими…

Аспик: пивтија или желатинозна маса.

Бардирање: продукт завиткан или прекриен со парчиња сланина.

Бланширање: преливање на храната со врела вода или кратко обарување.

Гратинирање: запечување на јадењето во рерна, посипано со рендано сирење или пармезан, или прелиено со јајца и павлака.

Динстање: омекнување на месо или зеленчук со масло или течност, најчесто во покриен сад.

Дресирање: врзување на крилцата на живината пред печењето.

Дресинг: маринада (прелив) за салати.

Жилиен: продукт исечен на тенки долгнавести парчиња.

Желирање: печен или варен продукт, прелиен со желатинозна маса.

Карамелизирање: овошје, ореви, лешници и сл.натопен во растопен шеќер.

Конкасе: домат, излупен, исчистен од семки и исечен на коцкички.

Легирање: чорба или сос, згуснат со брашно, скроб, жолчка или павлака.

Маринирање: месо оставено извесно време да одлежи во течност со зачини.

Панирање: парчиња месо или зеленчук, извалкани во брашно, матени јајца и презла, пред пржење.

Поширање: обарен продукт до граница на вриење, но без да зоврие.

Пешт: ситно сечкана сланина, со лук и магдонос.

Ројал маса: млеко или павлака со изматени јајца.

Сотирање: месо, пилешки дропчиња и сл.исечкани на долгнавести парчиња или на коцки, нагло пропржени за да поруменат, а потоа да се динстаат додека не омекнат.

Тимбал: Садови со различни облици за сервирање на јадење.

Филирање: печеното или варено месо, да се исчисти од коски, да се исечка на парчиња и да се сложи во првобитен облик пред служење или исечено месо и риба, во форма на филети (шницли).

Фламбирање: преливање на јадењето со некој жесток пијалок и запалување.

Шпикување: кога низ месото се провлекуваат парчиња сланина, лук или зачин.

Шофродирање: преливање на подфотвеното месо со желиран сос.