Нема кино во Велес, млади гледаа филм на плоштад

Членовите од Медиа Арт клубот при Младинскиот образовен форум на Велес на плоштадот „С’рмаале“ подготвија урбано кино на отворено. По низа предавања од уличната уметност и стекнување на вештини за цртање изработија сопствен арт телевизор на кој го проектираа документарениот филм со наслов „Banksy vs Robbo & The Graffiti War“. Овие млади ентузијасти ја разбираат потребата на нивните врсници и на сите млади во градот за кино сала.

„Киното е објект кој служи за културен развиток на граѓаните, дружба, забава како и план за петочна ноќ на младите. Градот Велес со години нема кино. Самото тоа го гледаме како неуспех на надлежните поради тоа што и покрај многуте иницијативи за обнова на киното, очигледно надлежните не обрнуваат внимание на желбите на граѓаните на градот, изјави Илина Димовска координатор на настанот.

„Настанот кој се одржи е настан со кој имавме за цел да ја подигнеме свеста на граѓаните за тоа зошто ни треба кино. Седнавме на С’рмаале, наместивме платно и проектиравме филм. Сметаме дека граѓаните ја сфатија нашата порака- немамеве услови за да изгледаме еден филм, а дружбата меѓу нас младите и интересот за филмот беше очигледна, изјави Стефан Каракачанов координатор на настанот.

Велес одамна нема кино а граѓаните многу често за да гледаат филмски проекции одат во Скопје или во Кавадарци./У.Ј