(фото) Втор ден штрајк, велешани не бараат услуги од фондот за здравствено осигурување
![](https://duma.mk/wp-content/uploads/2024/02/Untitled-design-63.png)
Нема граѓани пред влезот на зградата во Фондот за здравствено осигурување во Велес како и на шалтерите кадешто се издаваат услугите за странки. Вториот ден од штрајкот минува мирно, без инциденти. Вработените соопштија дека откако е започнат штрајкот, не доаѓаат странки за издавање на услуги, со што сметаат дека велешани ја почитуваат нивната одлука и го поддржуваат штрајкот.
![](https://duma.mk/wp-content/uploads/2024/02/Untitled-design-60.png)
![](https://duma.mk/wp-content/uploads/2024/02/Untitled-design-61.png)
Штрајкот на вработените од фондот за здравство започна вчера, на петти февруари, како реакција на препораката од Владата од 9 јануари, за намаување на платите од 21 процент. Вработените во моментов извршуваат само неопходни работни задачи, поточно, еден вработен во подрачните единици е задолжен за прием на документи, се извршуваат задачите како пријава на малолетно лице како член во осигурување, регулирање на осигурување за хоспитализирано лице и лекување во странство за итни случаи. Непречено ќе работат само лекарските комисии што ги продолжуваат боледувањата на вработените за тие што имаат потреба.
![](https://duma.mk/wp-content/uploads/2024/02/Untitled-design-62.png)
Од Синдикатот на Фондот за здравствено осигурување при УПОЗ најавија дека сите подрачни единици од Фондот за здравство продолжуваат со штрајкот. Со одлуката се засегнати 831 вработен во ФЗО и ако има намалување на платите, според претседателот на Синдикалната организација на ФЗО Бранко Аџигогов, 25 проценти ќе добиваат плата со износ под минимална плата, а 25 проценти колку минималната плата.
Стефани Манева
![](https://duma.mk/wp-content/uploads/2021/05/SEMM.jpg)