Со модерен танц до сребрен медал
Танчерската група од Ј.Х.Константинов Џинот го освои второ место на меѓународниот танцов натпревар во Скопје. Tанчерите велат резултатите и успехот ги следат упорните и креативните. Токму такви се членовите на танчерската група „Максима“ од основното училиште Јордан Хаџи Константинов Џинот. Шесте ученички ги покажаа своите танцови способности , на меѓународниот натпревар „Македонија опен“ што се одржа во Скопје, го освоија второто место и се закитија со сребрен медал.
На натпреварот се претставиле со кореографија на менторката Даниела Тумбова и велат дека се многу задоволни иако немале многу време за вежбање.
„За само три недели, вложивме многу напор и дадовме се од себе за да го постигнеме овој успех и второто место на натпреварот. Имаше голема конкуренција и групи од Србија ,Будимпешта ,Подгорица и од повеќе градови од Македонија“, рече Габриела Лескова член на танчерска група „Максима“.
Со истата кореографија танчерската група денеска ги развесели и вработените во локалната самоуправа. Им посакаа уште поголем успех во иднина, но им ветија и поддршка.
„Сакам да им честитам на учениците за овој успех ,но и да ги охрабрам да продолжат да работата понатаму ,а од градоначалникот ќе имаат поддршка во секое време“, рече Славчо Чадиев градоначалник на општина Велес.
По успешниот настап во Скопје овие млади танчерки ќе настапат и во Црна Гора. Танцот е тој што ги спојува сите и им дава сила да продолжат во иднина, па дури и професионално да се занимаваат со него./Д.С