Случајот платено убиство во Ореше повторно се одложи
Да се спојат во една постапка кривичното дело потпалување на селската продавница и нарачаното убиство на седумдесет и четири годишниот Лазо Милошевски, побара денеска адвокатот на првообвинетиот Ѓоре Петровски за случајот Ореше. Според него двете постапки што се водат во велешкиот суд против Петровски законски треба да се спојат во една постапка.
„За тие две постапки побаравме да се спојат во една за да се донесе и една пресуда, бидејќи така е по законот, рече Коста Нојков.
За синот на убиениот старец од Ореше, ваквиот начин на водење на судската постапка е само одолговлекување на процесот. Но сепак верува во институциите дека на крај правдата ќе излезе на виделина.
„Јас сум сигурен дека државата работи правилно и ова дело ќе го заврши до крај, рече Ацо Милошевски, син на убиениот старец.
Но со него не се сложи бранителот на браката Ѓоргиевски Ѕвонко Давидовиќ кој соопшти дека неговите клиенти никогаш до сега не барале одлагање на судскиот процес.
„Очигледно овој предмет траеше 6-7 години но не беа расчистени некои работи и затоа резултираше со две три укинувања на пресудата, рече Давидовиќ.
Инаку ова е четврти обид да се заврши судскиот процес за убиството на Лазо Милошевски од селото Ореше во основниот суд во Велес. Досега во три наврати Апелациониот суд ги укинуваше пресудите на понискиот суд. Два пати тие беа осудителни, со по 12 годишни затворски казни за извршителите на убиството браќата Ѓоргиевски кои ги укинуваше скопска Апелација исто како и ослободителната, последна, пресуда кога предметот повторно го врати во велешкиот суд. Во него првообвинет е Ѓоре Петровски, за нарачател на убиството на старецот а второобвинетите, за изврршување на убиството, браќата Љупчо и Ордан Ѓорѓиевски.
Судскиот процес продолжува на 23-ти април, годинава./Д.С
Велешкиот суд бара убиството од „Ореше“ да го суди друг суд
Апелациониот суд во Скопје во најкраток рок треба да одлучи по барањето на судот во Велес за определување на друг месно надлежен суд што ќе го суди предметот за платеното убиство во селото Ореше.
„Дума“.мк од извори во Апелациониот суд во Скопје дознава дека до нив било поднесено барање за делегирање на друг суд кој ќе постапува по предметот „Ореше“, што треба да почне да се суди по четврти пат.
-Судот од Велес побара од нашиот суд да донесе решение за делегирање на надлежност на друг суд што ќе го суди предметот за убиството во Ореше. Доколку биде прифатено барањето, најверојатно тоа ќе биде Кривичниот суд во Скопје. Ако пак биде одбиено, судењето по четврти пат треба да почне пред судот во Велес, но овој пат пред комплетно нов состав на судии и обвинител –открива за „Дума“.мк судија од скопскиот суд, кој е запознат со содржината на барањето.
Судијата, кој побара да остане анонимен, за „Дума“.мк открива дека велешкиот суд побарал друг суд да постапува по овој предмет, токму поради последните настани каде што беа уапсени и осудени судијата кој го имаше предметот „Ореше“ до сега и донесе три пресуди, јавниот обвинител и адвокати кои на одреден начин биле инволвирани во предметот. Судот наведува дека обвинетите и дел од нивните адвокати се од Скопје па пред скопскиот суд ќе се спроведе поекономична постапка.
Скопска апелација, која ја укина и третата пресуда, ослободителната, покрај двете осудителни пресуди по 12 години затвор за обвинетите Ордан и Љубе Ѓорѓиоски, дава напатствија, за тоа што треба да изведе судот како доказ на следното, четврто по ред судење.
Судиите, во Велес или Скопје, сеедно, треба да ги сослушаат полициските инспектори кои биле на увид и ја нашле рамката од пушката од која бил убиен Лазо Милошевски (дополнително е пронајдена во близина на селото, наводно по кажување на досега заштитениот сведок „Бреза“), како и тоа да се цени изјавата на Златко Арсовски, екс заштитениот сведок па да се одлучи дали ќе се прифати или не.
На прашањето на „Дума“.мк, зошто скопска апелација не одлучила заедно со жалбата по пресудата и за делегирање на друг суд, кога беше познат исходот на предметот „Ликвидација“, судијата од скопскиот суд открива дека тие не можат да донесат одлука сами, доколку нема барње од странките или од судиите кои постапуваат по предметот, односно претседателот на судот.
Дополнителен проблем во случајот со предметот за „Ореше“ е и несериозноста на скопските судии кои одлучија да има четврто судење по ред.
Нашиот соговорник признава дека повисокиот суд, наместо да ја укине пресудата можел да отвори претрес пред тој суд, да ги изведе доказите и да донесе одлука, па на тој начин, предметот ќе можел да оди по желба и пред Врховниот суд.
„Дума“.мк дознава дека обвинителството во меѓувреме побарало да се спроведе истрага против Златко Арсовски, алијас „Бреза“ кој призна дека цело време додека бил заштитен сведок лажел, а тоа го правел по налог на МВР. Ако се утврди дека лажел нему му се заканува казна затвор до 5 години.
Предметот за „Ореше“ кој беше вратен физички од Скопје пред една недела во судот во Велес, доби нов судија и обвинител, на местото на Иле Танев и Ивица Ефремов кои се во затвор. Заедно со нив осудени се и поранешниот истражен судија Валентин Зафиров кој бил на увид во декември 2005 година кога е убиен старецот Лазо Милошевски и новинарот Томислав Кежаровски, поради откривање на идентитет на заштитениот сведок.
Тие беа осудени во предметот „Ликвидација“ на казни затвор од 1 до 6 години. Пресудата се уште не е напишана, по што по неа треба да се изјасни и повисокиот суд.
По одлуката на Апелација за тоа кој суд ќе постапува за случајот „Ореше“, во рок од 30 дена треба да биде закажано ново судење.
С.Д.
Напиши коментар
Станете член на ДУМА.мк и споделете го вашето мислење преку коментар. Кликнете тука за да се најавите.