Велешкиот совет годинава одработил три седници, по една месечно доволно за да се земе советничкиот паушал!
Три седници за три месеци сработија членовите на општинскиот Совет во оваа година. Во првите два месеци седниците беа закажани во последните денови од месецот со што советниците го фатија последниот воз за да го земат паушалот од околу 14 илјади денари. За датумите кога седниците треба да се одржат беа согласни советничките групи и на власта и на опозицијата. Ваквиот начин на работа градоначалникот не сакаше да го коментира.
– Начинот на работа на Советот е тема на договор меѓу претседателот на Советот и координаторите на советничките групи и јас не би сакал да се мешам во ова, рече Славчо Чадиев, градоначалник на Велес.
За претседателот на Советот пак нормално е во првите неколку месеци од годината да се работи поретко, а такви случаи се повторувале и во годините наназад. Според него престојнниот изборен процес не е причина за намалување на темпото на работа на Советот.
– Предизборието не значи дека Советот не треба да функционира. Поради новогодишните празниците во јануари нормално е Советот да има една седница, но тоа не значи дека не може да се закажат две седници туку поради празниците побавно оди подготовката на точките кои треба да се најдат на дневен ред. За февруари пак имаше само 13 точки и сметаме дека беше поефикасно да се најдат на само една седница, рече Александар Колев, претседател на совет.
На ваквиот начин на работа се согласи и опозицијата на која не и пречи што работеше на 31 јануари и 28 февруари. Во март пак, до сега е одржана само една седница на која се фатија крајните рокови за завршните сметки на општинските претпријатија, а до сега не е најавена уште една седница.
Услов за земање на советничкиот паушал е да се одржи барем една седница во месецот. Инаку овој состав на општинскиот Совет за 8 и пол месеци лани сработил 14 седници./Б.Н.