Покривот на хотел Интернационал, место за опасни детски игри
Не само што е дом за бездомници и зависници од дрога, напуштениот хотел Интернационал е место за детски игри. Навидум безгрижната детска игра на покривот на хотелот , може да стане многу опасна. Група од десетина деца секојдневно искористувајќи го убавото сончево време но и слободниот влез во висококатницата , го користат покривот за своите игри.
Некои од нив дури ги тренираат и нивните акробатски вештини, па знаат да скокнат и од неколку метри височина. Голем предизвик им е и бескрајниот поглед што го нуди зградата, па честопати одат и до работ на покривот само да погледнат надолу. Никој не ги гледа и никој не ги пази, очигледно родителите не ни претпоставуваат каде нивните деца си играат.
Безбедноста е загрозена не само за овие деца, туку и за луѓето кои живеат во близина на напуштениот хотел. Тој веќе неколку месеци е привремено засолниште на уште десетина бездомници и зависници од дрога.
Луѓето кои живеат тука стравуваат за својата, а најмногу за безбедноста на своите деца. Апелираат надлежните да превземат соодветни безбедносни мерки.
Напуштената зграда со искршени врати и прозорци ја грди и сликата на центарот на градот. Од неа секојдневно се чувствува непријатна миризба, бидејќи многумина ја користат како јавен тоалет.
Од општината се со став дека не можат да интервенираат бидејќи станува збор за приватен имот, но сепак треба да го слушнат апелот на загрижените граѓани и ако ништо друго барем да превземат безбедносни мерки./Д.С