Бузалково ќе ги бојкотира изборите ако власта не ги реши проблемите со откупувачите на тутун!
Гневни и револтирани се тутунарите од селото Бузалково бидејќи на последниот ден одо откупот на тутунот се во неизвесност.
Од една страна им остана годинешната реколта непредадена, од друга страна деновиве се соочени со проблемот со фирмите откупувачи кои не сакаат да потпишат договор за откуп со нив.
„Апелираме до премиерот и министерот за земјоделие да дојдат тука во селово и да ни кажат од што ќе живееме ние од следната година. Од 300 семејства само 20 потпишаа договори за откуп на тутунот кој деновиве веќе треба да го сееме. Не знаеме што ќе се случи со нашите семејства бидејќи сите од тоа живееме“, рече тутунар.
Велат дека и покрај обидите да добијат одговор зошто не се потпишуваат договори никој од фирмите не им кажува.
„Отидов вчера, ми велат дека не потпишуваат договор со мене и сега не знам што да правам. Леите се направени ама ако сеам тутун, ќе немам пласман каде да го продадам. Без договор не можам да земам ниту субвенции од државата, па се си мислам дека ова е предизборна манипулација на власта со нас, од нас ќе бара да и ги дадеме гласовите, а таа нас ќе ни помогне за пласманот“, рече тутунар.
Тие се заканија дека ако никој не преземе мерки ќе ги бојкотираат престојните избори, а на власта и порачаа воопшто да не доаѓа во нивното село по гласови. Разочарани се од односот на државниот инспектор и градоначалникот на Велес кој им кажал дека не е надлежен за да го реши нивниот проблем. И покрај тоа што денеска е последниот ден за откуп на тутунот, со тони бали стојат во нивните амбар и се непредадени./Б.Н.