Само 36 отсто од невработените се пререгистрирале за здравствено осигурување
Над 3.000 илјади или 36 проценти од вкупно 8.300 осигуреници во Велес се пререгистрирале во фондот за здравствено осигурување. Од подрачната служба на фондот се задоволни, велат дека одзивот на невработените граѓани е голем.
– Солиден е процентот, очекуваме и во наредниот месец, осигурениците континуирано да доаѓаат за пререгистрација и еден апел до нив да не чекаат последните денови од законски предвидениот рок, рече Анде Марковски, раководител на ФЗОМ Велес.
Невработените велешани можат да се пререгистрираат до крајот на март. За да добијат бесплатно здравство мораат да се пререгистрираат и да пополнат изјава дека во изминатата година не оствариле приходи.
– Досега граѓаните лесно се снаоѓаат, бидејќи не им е прв пат. Не бараат многу објаснувања, ама ако им се потребни ние сме тука да им помогнеме, рече Марковски.
Ако не ја исполнат оваа законска обврска, осигурениците ќе имаат прекин во здравственото осигурување, а со тоа ќе изгубат и одредени услуги.
– Доколку не се пререгистрираат ќе бидат одјавени од фондот, а со тоа ќе го изгубат и континуитетот во осигурувањето. Ќе изгубат и некои услуги, како на пример, не ќе можат да користат бесплатни ортопедски помагала, рече Марковски.
Бесплатно здравство им следува само на оние осигуреници кои не оствариле поголем приход од 96 илјади денари. Во спротивно ќе треба да платат половина од осигурувањето месечно кое изнесува 1.100 денари. Ако оствариле приход над три илјади евра, во тој случај сами го подмируваат месечниот надомест од 2.200 денари./Д.С