Претепаното магаренцe Ријана ќе добие нов и безбеден дом во еко фарма!
Ќе се вдоми магаренцето кое пред една недела беше претепано од неговите сопственици, а кое активистите на здружението за заштита на животните го пронајде и го крсти Ријана. Токму тие му најдоа нов дом во еколошката фарма во скопското село Побожје. Но, од „Гласот на животните“ велат дека борбата за здравјето на магарето се уште трае бидејќи раните кои ги доби од претепувањето се сериозни.
– Се уште е неизвесно кога ќе ја транспортираме до фармата во која сме уверени дека ќе ја добие потребната нега каде што животот ќе го помине како среќно магаренце кое нема да биде користено за работа бидејќи таму животните ги чуваат со голема љубов. Контактиравме со луѓето и тие се подготвени да ја згрижат Ријана. Но, сепак потребно е таа да биде транспортирана до Скопје, каде мора да ги помине сите потребни прегледи на ветеринар бидејќи ногата и е во страшна состојба и под итно мора да се снима на ренген, вели Магдалена Ѓорѓиева, Гласот на животните.
Поради ова тие молат за помош од сите добронамерни луѓе. Инаку се уште не се знае кои се луѓето кои крвнички го претепаа магарето со дрвени даски по што вилицата поради повреден нерв му се оддели од устата, а тоа заврши и со скршеници по телото и нозете.
Дехидрирано и изнемоштено после неколку дена од ќотекот за кој има и очевидци, во дворот на основното училиште Васил Главинов го пронајдоа активистите на здружението и го згрижија. Сепак среќни се што на тажната приказна за Ријана и се навестува среќен крај./Б.Н
Донациите може да се испраќаат на:
ЗЗЖ ГЛАСОТ НА ЖИВОТНИТЕ
ДЕНАРСКА СМЕТКА: 300270000101436
ДЕПОНЕНТ: КОМЕРЦИЈАЛНА Банка АД Скопје