Пензиониран полицаец заработи три години затвор за надрилекарство
Осуден е денеска седумдесет годишниот пензионер Благоја Ангелевски – Мајка од Кавадарци поради нанесување на тешка телесна повреда на сега веќе починатиот Лазар Николовски од скопско Волково. Пресудата ја донесе основниот суд во Велес. Судот го огласи Ангелевски за виновен бидејќи без стручна подготовка а за пари, 500 евра, го лекувал од бемка Николовски.
Починатиот осумдесет годишен маж побарал помош од Ангелевски за отстранување на бемка на десната надлактица. Надрилекарот се нафатил и во два наврати, во октомври и ноември 2011 година ја отстранил, без медицински помагала туку со користење на негов прибор, пинцета во вид на јадица, во подрумот на зградата во која живеел. Потоа кај Николовски се создале компликации. Тој побарал лекарска помош затоа што на местото на отстранетата бемка почнал да му расне израсток и достигнал големина на печурка, која прокрварела. Лекарите констатирале дека израстокот појавил малигни метастази. Човекот починал во јуни 2013 година.
Во судницата сведочела неговата сопруга Верица. Таа раскажала како Благоја Ангелевски – Мајка го видела на телевизија и му предложила на сопругот да го побараат. Ги примил во подрумот на зградата во која живеел во Кавадарци.
– Имаше буриња и дрва. Јас неможев да гледам кога ја вадеше бемката. Но во рацете држеше некаква пинцета со изглед на јадица. Кога го извади последниот дел од израстокот местото го бришеше со тоалетна хартија. Потоа го намачка со некаков лек и ни рече три дена да не се мие лице. Не три туку тринаесет дена поминаа а тој крвареше. Пак го побаравме и бевме кај Ангелески. Повторно работеше нешто и на крај рече дека еден дел уште морал да доизвади, рекла Верица.
Надрилекарот пред судијката Габриела Гајдова се бранел со зборовите „Неможете да ме негирате, јас работам 47 години“. Тој раскажал како успешно излекувал многу луѓе од израстоци на кожа, рак и ензема.
Судска медицина направила вештачење според кое нестручноста на Ангелевски – Мајка ја дефинирала во отстранувањето на бемката кое го предизвикало ракот на кожата./Б.Н