Само што почна и се одложи повтореното судење на случајот „Ореше“
Да бидат изземени двете судијќи Тања Милева и Габриела Гајдова од петчлениот судечки совет во предметот за платеното убиство во селото Ореше побараа денеска адвокатите на обвинетите. Тврдат дека и двете биле вклучени во продолжувањето на притворот на обвинетите во трите постапки кои претходно се водеа за овој случај.
– Побаравме да бидат изземени претседателот на судечкиот совет и членот бидејќи учествувале во овој предмет, биле дел од кривичен совет, едната два пати а другата еднаш при одредувањето на мерката продолжување на притвор за обвинетите. Законот предвидува дека во ваков случај не може да се постапува во предметот. Ќе видиме како ќе се изјасни претседателот на судот. Важно е за овој предмет конечно да почнеме да работиме според законот, што минатите пати не беше случај, рече Ѕвонко Давидовиќ, адвокат на браќата Ордан и Љупчо Ѓорѓиеви, обвинети за убиство.
Образложението адвокатите ќе го достават до претседателот на велешкиот суд, но за ова побараа рок од три дена, што им беше и дозволено.
– Оваа постапка е во функција на одолговлекување на процесот, рече јавниот обвинител Славица Темелковски во судницата на судот во Велес каде денеска по четврти пат почна и веднаш се одложи главниот претрес.
Спротивно на ова пак адвокатите тврдат дека сакаат да не се повторуваат досегашните грешки и уште на стартот на процесот да се работи по закон.
-Мора уште на самиот почеток да се почитуваат сите законски прописи и се надеваме дека тоа и ќе се случи, рече Анѓел Ѓорѓиев, адвокат на Ѓоре Петревски, обвинет дека е нарачател на убиството.
Инаку ова е четврти почеток на судењето на Ѓоре Петровски кој е обвинет дека го нарачал, а браќата Ордан и Љубчо Горѓиевски го извршиле убиството врз 71 годишниот Лазо Милошевски на 2 декември 2005 година во селото Ореше.
Во два наврати браќата добија по 12 години затвор, а по носењето на Петревски од Америка третиот пат сите беа ослободени.
Иако судот бараше негово изземање сепак повторно во Велес започнува постапката, но во комплетно нов состав. Речиси сите учесници кои до сега работеа на случајот, судиите, адвокати, обвинител, посредници и новинарот Томислав Кежаровски беа осудени за дела поврзани со него.
Во моментов во велешкиот суд се работи на постапка против поранешниот заштитен сведок Бреза, Златко Арсовски кој се соочува со можност од обвинение за лажно сведочење.
Во одделението за организиран криминал во Скопје пак адвокатите на одбраната поднеле тужби против повеќемина кои на било каков начин влијаеле врз сведочењето на Арсовски, а меѓу нив има поранешен директор на затвор, инспектори од МВР и блиски на убиениот. Судењето за платеното убиство продолжува на 1 април./Б.Н.