Случајот Ореше, по четврти пат, во судница на велешки суд
На обвинителната клупа денеска повторно ќе седнат , според обвинителството, Ѓоре Петровски нарачателот на убиството на старецот Лазо Милошевски, како и обвинетите за извршување на убиството браќата Ордан и Љупчо Ѓорѓиевски.
Апелацискиот суд од Скопје ја укина ослободителната пресуда на велешкиот суд и случајот повторно го врати на разгледување. Сега предметот ќе го суди, судијката Тања Милевска.
Досега апелацискиот укина три пресуди на понискиот суд. Во петте години, колку што претходно траеше судењето беа донесени две осудителни пресуди со затворски казни од по 12 години за браќата Ѓоргиевски и една, последната за нив и за Петровски, беше ослободителна.
Неа и претходеше пресвртница поточно откривање на идентитетот на заштитениот сведок Бреза. Златко Арсовски јавно го обелодени идентитетот се извини на обвинетите со зборовите дека бил приморан да лаже дека тие се нарачател поточно извршители на убиството на 74 годишниот Лазо Милошевски од пред неполна деценија.
Случајот „платено убиство во велешко Ореше“ почна во 2003 година. Го следеа неколку контаверзи. Една од нив беше разрешувањето на првиот судија, Валентин Зафиров. Тој како и вториот судија Иле Танев и обвинителот Ивица Ефремов сега се осудени во предметот „Ликвидација“ со затворски казни од две до четири години.
Денеска ќе се знае кој ќе биде нов обвинител во овој повторен случај. Во судницата по четврти пат ќе се бара виновникот за смртта на Лазо Милошевски од селото Ореше кој вечерта, на 5 декември 2005 година беше застрелан од огнено оружје во својата куќа./Б.Н