Првата државна награда за волонтерите на општина Велес
Дванаесетте волонтери кои се ангажирани во одделенијата на општината и помагаат при одржување на културни манифестации, одговараат на телефонските повици на граѓаните на бесплатната СОС линија, се грижат за старите изнемоштени лица во градот и помагаат во работата на граѓанскиот сервис центар ја добија наградата на министерството за труд и социјална политика за најдобар организатор за волонтерска награда во Македонија.
Тие денеска беа задоволни што се првите волонтери во државата кои добија признание за својата работа. Наградата им ја честиташе градоначалникот Славчо Чадиев.
– На сите нив им посакувам успех во понатамошната работа, да бидат одговорни им посакувам да продолжат да бидат одговорни како и досега независно каде ќе добијат шанса да го стекнат својот работен стаж а на сите работодавачи што имаат можност да примат волонтери од нашето позитивно искуство им препорачуваме тоа да го сторат што поскоро и да ги почуствуваат благодетите од волонтерското ангажирање, рече Чадиев.
Сите дванаесет волонтери кои работат во општина Велес имаат завршено високо образование. Вработените во општината велат дека се задоволни од соработката, помошта и секако одговорноста што ја покажале овие лица во изминатиот период./Б.Н