Поезијата сеуште е модерна, а не е стара мома!

Ваква порака од Кавадарци до сите љубители на пишаниот збор испратија четирите русалки Снежана Стојчевска, Катерина Батаклиева, Аница Блажевска и Цветанка Колева .  Тие дојдоа во градот и ги промовираа своите стихозбирки  „ Шеќер по подот“ , “Мижитатара“, “Жега“  и „Ладно кафе“. Книгите, во последно време, дигнаа голема прашина во државата и ја разбрануваа поетската сцена.

Овие четири девојки, веќе го носат епитетот – самовили, a меѓусебното дружење го започнале на интернет каде на своите блогови ги објавувале  првите напишани стихови. Потоа сватиле дека можат заедно да работат.

“Ние се препознавме по начинот на пишување и едноставно ни се случи соработка. Идејата се роди лани во декемеври, за шест месеци подоцна да ја реализиравме на официјална  промоција во Скопје. Доаѓаме сите од различни градови, но тоа е доказ дека поезијата ја има насекаде“ рече Цветанка  Колева. Таа впрочем беше и домаќин на помоцијата во Кавадарци.

Стиховите кои ги напишале овие млади поетеси се полни со љубов. За неа пишуваат и со тага преку случки од секојдневниот живот, во кои трагаат ама и наоѓаат љубов. Сите четири поетеси рекоа дека имаат единствена цел а тоа е да ја оживеат и да внесат возбуда на поетската сцена во Македонија.

Трајче Бјадов нив ги нарече четири девојки – русалки, на тој начин правејќи компарација со словенската митологија во која зборот русалка означува сирена или самовила. Овие поетеси ќе останат запаметени по пораката,  поезијата да биде разбрана како модерна а не како стара мома.

По Скопје, промоција на нивните стихозбирки, се случи и во рамките на манифестацијата „Кавадаречка културна есен“. Поетесите најавија дека ќе продолжат да ги промовират своите книги и во поголемите градови во државата.