Издумани Крлевизми: „Вистината исплива на површина, но далеку од брегот“
Велешкиот афористичар Атанас Крлевски овој петок испрати десет нови крлевизми на тема „за вистината“. Прочитајте ги и како што вели Крлевски слободно пронајдете се! Следете не и следниот петок, да видиме која следна тема ќе го инспирира велешкиот афористичар. Уживајте!
-Секоја борба за вистината е нерамен бој.
-Вистината не е веќе во виното. Си кажуваме сѐ и со вода.
-Не можам да и погледнам на вистината во очи. Кога ќе ме види, го спушта погледот.
-Секому му ја кажувам вистината в лице. На дволичните двапати!
-Вистината исплива на површина, но далеку од брегот.
-Вистината излезе на виделина, но тој умре во темница.
-Тешко ми е кога лажам за да ја зачувам вистината.
-Му недостасуваат вистини за испиеното вино.
-И во жолтиот печат има вистина. Името на весникот.
-Голата вистина ја нема и во сексот. Ја избркаа силиконите.
Афористичар
Атанас Крлевски
Дума.мк