Промовирана шесттата книга на Игор Крајчев „Лудило.Писма.Откровение“
![](https://duma.mk/wp-content/uploads/2021/06/IgorKrajcevpromocija1sologo.jpg)
Најзрела поетска книга на Игор Крајчев, создадена во момент кога поетот се одделува од останатите поети, од тоа што во поезијата се нарекува стандард и што секој поет не успева да го постигне за целосната негова поезија да стане субјективна работа. Вака првично Проф.д-р Венко Андоновски ја оцени новата книга „Лудило. Писма. Откровение“ на Игор Крајчев.
-Јас таа поезија ја нарекувам поезија на веќе внатрешно формиран поет. Човек којшто ја бара смислата на животот и во некој не земни нешта. Значи, неговите молитви испеани до Бога се врв, можеби и нешто што е најубаво испеано во македонската поезија. Знаете од она егзистенцијалистичко барање на смислата во револуција, во правда на земјата одеднаш Крајчев се свртува кон би рекол теозовска димензија. Има тука и филозофија и теологија. И се бара смислата во едно врвно начело што се вика Источник на смислата. Но, сакам да нагласам дека ова не е религиозна поезија, тесно православна и црквена. Не. Станува збор за филозофското поимање на Бог и колку тоа човекот може да биде Бог. А тоа е вечна, уневерзална порака карактеристична само за големи поети, додаде Андоновски.
Оваа книга најдиректно кореспондира со внатрешноста на авторот, без имагинација, туку со реални чувства, целосно произлезени од емотивните и животни случувања во изминатата година и што најсликовито, низ зборот, го отцртуваат Игор Крајчев.
-Можеби таа искреност на чувствата, што на некој начин произлегле додека ја создавав книгата, придонесоа да биде високо оценета затоа што во неа има многу емоција и филозофија и на некој начин ме опишува мене како човек и како автор. На почетокот започнува со една голема доза на песимизам а завршува на крајот, според мене, многу оптимистички затоа што сметам дека тоа што му фали на човештвото е надеж, додаде Крајчев.
![](https://duma.mk/wp-content/uploads/2021/06/IgorKrajcevpromocija2sologo.jpg)
Промоцијата на книгата „Лудило. Писма. Откровение“ се одржа, денеска, во Ликовен салон во Велес пред повеќемина македонски писатели како и поети и писатели што се учесници на 58 Рацинови средби, почитувачи на пишаниот збор, пријатели на авторот и Градоначалникот на Велес, Аце Коцевски.
Книгата ја претставија проф. д-р. Венко Андоновски и проф. др Кристина Николовска.
Авторот Крајчев меѓу другото соопшти дека не мирува и дека по едногодишната работа на „Лудило. Писма. Откровение“ веќе работи на седма книга, од нив пет поетски, што очекува да ја заврши во текот на летото.
Убавка Јаневска
![](https://duma.mk/wp-content/uploads/2021/05/SEMM.jpg)