(Bидео) Активен утрово е и пожар на отворено над село Мелница, ЦУК најавува можност за гаснење од воздух

Пожарот се запалил вчера, околу 15:40 часот кај месноста „Ливаѓе“, над село Мелница. Според информации на Регионалниот ЦУК Велес пожарот го пријавиле работници на ЈП „Национални шуми“ – подружница „Бабуна“ од Велес. Станува збор за пожар кој е на непристапен терен. Оган има и утринава.

Од Центар за управување на кризи најавија можност во текот на денешниот ден да се побара и подршка од воздух за да се локализира и изгасне пожарот.

Исто така, ЦУК повторно упатува апел да не се пали вегетација на отворено. Појава на пожар што побрзо да се пријавува на Единствениот повикувачки број за итни случаи 112 како и другите итни случаи особено кога граѓаните имаат животозагрозувачки ситуации.

Истовремено, ЦУК информира дека потребно и корисно е да се следат препораките и информациите од медиумите за превенција, а и за реагирање при итни случаи.

Убавка Јаневска