Посното бело гравче со суви чушки обележје на Чист понеделник-го слават мегданчани но и сите добронамерни граѓани
Миризбата на белото посно гравче, се шири низ велешката населба Мегдан. Го привлече вниманието на десетици добронамерни граѓани кои и годинава дојдоа да бидат дел од вековната традиција.
Мегданчани го слават Чист понеделник, денот по Прочка со кој започнуваат Велигденските пости. Ракијата, виното и посните салати и годинава се декор на свечената трпеза на Мегдан. А нив ги обезбеди годинешниот домаќини. Акександар Ангелов. Со венец од суви чушки на вратот и со широко отворено срца овој млад човек ги пречекуваше добронамерните гости. А нив ги има се повеќе и повеќе, доаѓаат од сите делови на градот и се дружат до доцна навечер.
„Се нафатив да бидам домаќин за да ја продолжиме традицијата, за здравје за убаво. Си поканив гости, но добредојден е секој што ќе намине. Гравче има за сите, рече Ангелов.
Овој ден по прочка, ме враќа во деновите од мојата младост, ми ги буди спомените и ме прави среќен, раскажува мегданчанецот Ицо Картушот, човекот што ја возобнови вековната традиција.
„Оваа традиција е од 1990 година па наваму. Пред тоа беше прекината, да ви кажам искрено, јас ја прекинав и јас ја возобновив. Ручекот односно белото гравче ќе се дели точно во 14.30 часот, откако свештеникот ќе го благослови, рече Ицо Картушот.
Старите мегданчани потсетуваат дека Чист понеделник први почнале да го слават старите велешани Ѓорѓи Гајдата и Благој Тоцинот. Се празнува токму на ова место, затоа што името го добило од турскиот збор мегдан, што значи чистина, од каде се гледа целиот стар дел на градот.
„Секоја година со голема радост го славиме овој ден. Јас сум 69 години и се надевам дека ќе поживеам уште многу за да бидам дел од оваа традиција“, рече Димитар Минов.
Со или без поддршка, оваа традиција нема да изумре, Чист понеделник ќе се слави уште многу години, велат мегданчани. Горди се на себе што традицијата се помасовно ја прифаќаат и младите генерации.