(ФОТО) За својот патрон, за учителот, преродбеникот, борецот за слободна мисла и работнички права учениците подготвија перформанс
Ја прикажаа работата на Васил Главинов во столарската работилница во неговата родна куќа, како и неговата мисија за ширење на социјалистичка идеја помеѓу велешани, учителската дејност , ги отпеаја најубавите велешки староградски песни и низ перформансот не вратија во времето на македонската борба за создавање на своја, независна држава.
Присутните на денешното одбележување на патрониот празник на основното училиште кое го носи името на учителот и преродбеник во секоја соба од неговата родна куќа одиграа сцена поврзана со животот и делото на великиот македонец.
– Потсетивме дека дел од таа атмосвера, револиционерна возбуда, мисла за ослободувањето на Македонија е дело на самите Македонци се раѓала и случувала токму низ овие сокаци. Импровизиравме услови, во вистинската работилница или како што била наречена Комуна во родната куќа на Главинов, каде што биле задоени со социјалистичката мисла „наивните селанчиња“ како што се сушкало но, тие не биле наивни туку писмени и со богат дух граѓани за да се обидат да го направат тоа, да учествуваат во таа борба за оттргнување од ропството, рече авторот на перформансот, актерката Весна Димитровска Бобевски.
Во него беа внесени малку познати информации за јавноста како што е таа поврзана со тогашниот руски конзул во Австрија кој напишал дека во градот Велес населението не сака да се потчини на грчкото влијание. За велешанецот Драндар кој бил во Австрија и издал неколку книги за да го запознае светот со маките на македонскиот народ . За женското читалиште кое било формирано тогаш како и везењето на лавчето на знамето на Питу Гули од жените во Велес. Учениците ги толкуваа ликовите на Васил Главинов, Веле Марков, Никола Карев и Гоце Делчев.
Перформансот внимателно го одгледаа и министерката за култура Елизабета Канческа Милевска и градоначалникот на Велес, Славчо Чадиев.
– Со одбележувањето на двете значајни годишнини, 145 годишнината од раѓањето и 85 годишнината од смртта на Васил Главинов, денешната генерација на Македонци одава достојна почит кон животното дело на еден од најзнаменитите велешани, најголемиот борец за работнички права и достоинственживот, велешанецот Васил Главинов. И денеска навистина сум сеуште под импресии од она што можев да го видам од сите ученици кои ни дадоа еден краток осврт и приказ на историскиот и културен развој на Македонија. На сите им се заблагодарувам за се што направија и ни ја прикажаа таа силна верба, енергија, човечност, борба за нашата држава, за нашата историја, за идеалот, рече Канческа Милевска.
– Нашата обврска е морална и историска која преку одбележувањето на годишнините на историските личности е да ги доближиме младите генерации до делото на сите знаменити велешани а исто така и до времето и условите во кои тие живееле и твореле, рече градоначалникот Чадиев.
За нивното присуство и убави импресии од учениците и колективот се заблагодари директорката на училиштето Лилјана Николовска. Гостите, исто така, беа послужени со традиционалната напивка боза и можеа да се послужат со гевреци, локум, алва и бонбони.
Перформансот во спомен куќата на Васил Главинов ќе биде изведен уште два пати до вечер и ќе можат да го видат родителите на учениците и сите заинтересирани велешани./Д.С