Коцевски: ЈКП Дервен од општинскиот Буџет “испумпал“ 300.000 евра што ќе барам да се отпишат како долг на Општина Велес

На легален начин се крадела општина Велес во претходниот период кога со Општината раководеше ВМРО ДПМНЕ. Вака ја започна денешната прес конференција Градоначалникот на Велес, Аце Коцевски и соопшти податоци како кражбите биле покривани со легални документи преку постапките за јавни набавки, со одлуки на тогашните состави на Советот на Општината, на Управниот Одбор на ЈКП „Дервен“ и распишани тендери. Испупувани биле сретства од Буџетот на општината за ученичкиот превоз на начин кој што би практикуван кога било дозволено автопревозниците меѓусебно да се договараат и да не си конкурираат едни на други. Така тие нуделе многу повисоки цени од реалните на пазарот.

– За жал нашето законодавство не предвидело одбрана за овој вид на незаконско дејствување. Како пример ќе го кажам превезувањето на учениците од Сливник до Бузалково и назад, пат што во двата правци изнесува 9 километри, а цената по ученик изнесува 220 денари. За споредба цената за превесување на патници од Велес до Скопје, во двата правци изнесува од 220 до 260 денари, рече градоначалникот Коцевски.

Тој соопшти дека истото се случувало и со некои од градежните компании кои ги делеле сверите на интерес кои ги граделе водоводите, канализации, асвалтирање на улици каде се забележани повисоки цени од реалните на пазарот.

– Особено се индикативни следните две работи. Заради лошото водење на тендерските постапки од страна на вработените во општината има несоодветност од Советот за јавни набавки кога Општина Велес склучува договори кои од формално правен аспект се законски со добавувачи чии цени се многу повисоки од реално пазарните цени. Логиката е спротивна кога склучувате договори за големи количини и на тендер, цените би требало да паѓаат а не да раснат. Во конкретниов случај состојбата е сосема поинаква. Цените по кои се набавувани хартија и друг вид на канцелариски материјали без да се води грижа кој артикл по која цена се набавува а добавувачите најверојатно со луѓе од општината знаеле кои артикли најчесто се набавуваат па затоа ставале високи цени, а на оние кои не се набавувале или набавките биле во мали количини ставале многу ниски цени за на крај да испадне дека се најповолни, рече Коцевски.

Тој додаде дека откако ја смениле тактиката и распишале тендери праксата покажала дека на склучениот прв договор се добиле следниве цени за плаќање. Наместо како досега топ фотокопирна хартија која била плаќана по 208, 63 денари сега таа изнесува 138,13 денари, најлонски папки од 248,49 денари а сега изнесуваат 84,2 денари, плика од 2,85 денари сега 0,84 денари, плика средни од 5,69 денари на 1,68 денари итн.

-Третата уште повознемирувачка работа што сакам да ја соопштам е фактот што ЈКП Дервен, чиј основач е Општината на легален начин со одлука донесена од Советот на Општина Велес уште во 2011 година има утврдено цена на услуги што и ги дава на општината далеку повисоки од реалните пазарни цени понекогаш и по 300 % или по три до четири пати повисоки. Мислам дека тоа било одлука на ВМРО ДПМНЕ во тоа време да испумпува пари од Буџетот на Општина Велес со цел да создаде претпоставки за да се вработат што поголем број на заслужни партиски кадри и на тој начин бројот на вработените во ЈКП Дервен наеднаш е зголемен за над 100 работници. Меѓутоа се било во ред додека Градоначалник бил Горан Петров затоа што ги плаќал обврските кон Дервен. Одкога дошол наредниот Градоначалник престанало плаќањето на обврските и акумулиран е долг во висина од 89.366.878,00 денари или 1,5 милиони евра, рече Коцевски

Тој како илустрација ги спомна стопираниот проектот за конструкцијата за железниот надвозник кај Башино Село за кои на тендер фирмите изведувачи на тендер ја добиле работата за 80 денари по килограм челик споредувајќи го со цените што ЈКП „Дервен“ ги испорачувал за изработка на ракохвати и клупи, со помали заварувања а изнесува 220 денари. Разликата за иста работа изнесува 140 денари, пари што општината прифатила но, не му ги плаќала на комуналното претпријатие. Или за метар кубен бетон кој на пазарот чини 5.500,00 денари Дервен на општината фактурирал 7.800,00 денари. Така иако работниците на Јавното комунално претпријатие земале минимална плата од 10 или сега по сила на закон 12 илјади денари сепак во фактурите кон општината еден нивни работен час било барано да се плати по 400 денари наспроти реалната цена што не би требало да изнесува повеќе од 150 денари. Работниот час за градежните инжинери бил фактуриран по 800 денари наспроти реалната од 250 денари или за геометрите 600 денари наместо 200 денари од час, за ровокопачот – утоварач наместо реалната цена од 1.800 денари било фактурирано 4 илјади од час и трактор наместо за 400 денари бил пресметуван 700 денари без работници и 1000 денари со работници од час.

– Тоа значи дека на вештачки начин се создадени и фактурирани многу обврски по нереални пазарни цени. Има фактури од Дервен кои и не ги извршил. Хотелот „Вила зора“ и киното не работат, значи се заклучени а се објекти во сопственост на Општина Велес но Дервен наплатувал сметки за изнесување на смет како во нив да се извршува некаква дејност. Според пресметките Општината е оштетена за 823. 315,00 денари за сите години наназад, додаде Коцевски.

Градоначалникот најави дека од овие причини ќе побара од Управниот Одбор на „Дервен“ и од Советот на Општина Велес вкупниот долг на Општината кон Дервен да се намали за 20% затоа што станува збор за фиктивни нереални обврски./У.Ј