Јанакиевски:Опозицијата ако знае, да каже кој е владиниот функционер вмешан во Актор!
„Нека каже ако знае кој е високиот владин функционер кој е вмешан во аферата „Актор„. Ова денеска министерот за транспорт и врски Миле Јанакиевски и го порача на опозициската СДСМ, додека беше на увид на реконструкцијата на мост на автопатот близу Велес. Тој не сака да говори повеќе од она што и изминатите денови го кажал.
– Ако го знаат нека го кажат, инаку изградбата се одвива по договореното, истражните институции работат на случајот и јас немам што повеќе да додадам од она што и до сега го кажав, рече Јанакиевски.
Инаку за него е нормално што после десет години користење на делот од Неготино до Демир Капија, коловозот на оваа делница од коридорот 10 е оштетен. Вели дека дури по привршувањето на изградбата на делницата Демир Капија – Смоквица ќе се санира и оштетениот коловоз иако се почесто возачите се жалат на опасноста која демнее од многуте дупки и нерамнини и стана една од најопасните делници за возење.
– Таму поминуваат тешки товарни возила, граден е пред десетина години и нормално е да се оштети и да има предвидено пари за негово одржување. Веќе планираме да ги искористиме сретствата од ИПА програмата и целиот овој коридор да заличи на модерна делница, рече Јанакиевски.
Инаку и двете траси се дел од коридорот 10 и се градени со европски пари. Деновиве опозицијата во јавност објави документи со кои тврди дека грчки граѓани извлекле во кеш 3,5 милиони евра од сметката на грчката компанија “Актор” која го гради делот Демир Капија-Смоквица и запраша каде завршуваат толкави суми пари кои според податоците не се излезени надвор од земјава.
За ова се заинтересира и финансиерот, европската Инвестициона банка, а вчера обвинителството објави дека чека податоци од Управата за спречување перење пари.
Од компанијата Актор пак денеска се огласија со соопштение во кое велат дека секоја трансакција е законскае и реализирана во согласност со меѓународните и локалните закони и регулативи./Б.Н.