Нема кој да ги спречи децата и нивните oпасни игри на покривот на хотел Интернационал
Наместо зелените парковски површини, атрактивно место за детски игри од неодамна стана покривот на Хотелот Интернационал. Токму тука десетина деца секојдневно ги тренираат своите акробатски вештини, скокаат од помошната просторија која е висока над дваесет метри. Но не ретко знаат да застанат и до работ на зградата и да гледаат надолу. Изгледа како наивна детска игра, но може да биде многу опасна.
Еден погрешен потег и ете ти несреќа. Дури тогаш сите ќе се чудиме, како дошло до тоа и ќе се прашуваме, кој ќе ја сноси одговорноста. А одговорноста по правило треба да ја сноси сопственикот на зградата, кој ја остави на милост и немилост на времето. Па сега напуштена личи на руина, со искршени врати и прозорци.
Никој не води сметка за неа, а тоа го користат децата кои водејќи се од својата наивна љубопитност и радозналост, слободно ја истражуваат нејзината внатрешност, стигнуваат до врвот и играат. Тоа за нив е едноставна работа затоа што во зградата на хотелот може да се влезе од сите страни. Објектот е целосно демолиран, од него се крадат вратите и прозорците.
– Ноќе доаѓаат групи луѓе кои слободно си вадат се што сакаат, ги однесоа металните или пе ве це врати и прозорци од надворешноста на објектот и сега вадат и крадат од дрвените врати од собите во хотелот, раскажуваат соседите од улицата на која се наоѓа зградата. И тие како и вработените во продавниците на оваа улица, во центарот на Велес, велат дека штом ги забележат се обидуваат по секоја цена да ги разубедат децата од покривот да се симнат долу.
Локалните власти денеска ни рекоа оти не можат да интервенираат на оваа алармантна ситуација. Од општина Велес соопштија дека објектот е приватен имот и не можат да се мешаат. Но потврдија дека веднаш ќе стапат во контакт со сопственикот на хотелот за да превземе безбедносни мерки.
Додека не се огласи сопственикот, напуштената зграда и понатаму ќе биде мета на бездомниците и зависниците од дрога, каде во неа наоѓаат привремено засолниште. Додека не се превземат какви било мерки од неа и во иднина ќе излегуваат сомнителни лица и ќе се шири непријатна миризба. Се дотогаш и граѓаните кои живеат таму ќе реагираат и ќе стравуваат за својата и безбедноста на своите деца./Д.С