Кога заедницата ќе се мобилизира има надеж за спас и за безнадежниот човек
Некогаш почитуван сограѓанин и вреден работник, сега бездомник и во канџите на алкохолот. Педесет и седум годишниот Панче Андоновски заврши во нервното одделение во велешката болница. Без никакви човечки и хумани услови за живот во сопствената куќа, на Панче дом му се градските улици, а клупите кревет.
Во тешка здравствена состојба деновиве го затекнале вработените во Брзата помош, откако граѓани од неговиот роден Мегдан, каде сеуште ја има трошната куќарка, побараа новинарите да му помогнат на нивниот сосед . Панче неколку дена лежел на тротоарот скоро во безсознание. Искра се јави на телефон и рече „Ајде сите да се здружиме и да не дозволиме човек да ни умре пред очите“. Нејзиниот повик за помош го пренесовме во болницата а оттаму во брза помош. Тие го сместиле во нервното одделение каде закрепнува од алкохолот и лузните на животот.
„Во понеделникот педесет и седум годишниот пациент е донесен во нервното одделение и сега е во стабилна состојба. Ние повеќе не можеме да направиме ништо, но ги известивме роднините и Центарот за социјални работи“, рече Силвана Мишкова портпарол на болница.
Панче веќе неколку години живее од социјална помош, откако останал без работа, но и без своето семејство. Во меѓувреме останал и без паричната помош, бидејќи не можел да ги обнови документите. Од центарот за социјални работи велат дека се запознати со случајот на Панче и ја започнале постапката за згрижување и лекување. Известен е и Црвениот крст. Вработените ќе му обезбедат гардероба, а полицијата ќе се ангажира да му се направат лични документи.
„ Сега веднаш ке однесеме гардероба, од онаа што е подарена кај нас од граѓаните и ќе обезбедиме хигиенски производи за нашиот сограѓанин. Црвениот крст ќе ги плати трошоците за издавање на личната карта, рече секретарот на Црвениот крст Миле Маџаров.
Се додека трае постапката, за Панче ќе се грижат лекарите и персоналот во нервното одделение. Судбината си поиграла со овој наш сограѓанин. Освен редовно вработен во една од велешките фирми, Панче беше и еден од најпознатите Ди Џеи во земјава. Со своите музички вештини и познавања, ги забавуваше граѓаните преку брановите на Радио Велес. Сега без никој никого, оставен на милост и немилост на луѓето, Панче ќе мора да се избори за да продолжи да го „живее“ остатокот од својот живот./Д.С