Седумдесет и две години од штрајкот на велешките Гимназијалци против бугарската пропаганда
Пензионерот Ристе Ристевски е еден од учесниците на штрајкот во велешката Гимназија против бугарската пропаганда. Тој денеска се присети што се случило на денешен ден пред 72 години. Со гордост вели дека бунтот на гимназијалците успеал, а за настанот известило дури и Радио Лондон.
– Во секој клас имаше незадоволство ,препирки и гужви. Зошто викам дека тој беше успешен ,затоа што за него извести радио Лондон ,а директорот и професорот по историја беа сменети и на нивно место дојдоа нови луѓе, рече Ристе Ристевски учесник на штрајкот.
Велешките гимназијалци штрајкот го планирале два месеци. Иако полицијата разбрала за нивните намери и организаторите биле исклучени од училиште, сепак истрајале во намерата, да го кренат гласот против бугарскиот окупатор.
На денешен ден во далечната 1942 година, своето незадоволство први го манифестирале учениците од седмиот клас, зад низ застанале граѓаните, па дури и дел од властите.
– Штрајкот успеа затоа што зад него застанаа сите граѓани ,па дури и градоначалникот Коце Ванов ,а сите ученици кои беа исклучени беа вратени назад и ја завршија годината, вели Ристевски.
Историскиот настан денеска свечено го одбележа Општинската организација на сојузот на борци. Делегации положија свежо цвеќе во основното училиште Благој Кирков, каде некогаш се наоѓала најстарата Гимназија на Балканот.
Свежо цвеќе положија и пред споменикот на Кочо Рацин пред велешката Гимназија./Д.С