Земјоделци од велешко во банките подигаат пари за субвенции на тутун
Над 1.500 тутунопроизводители кои лани, до крајот на годината, го предале родот денеска земаа субвенции. Еден од нив беше земјоделецот Зоран Наков од селото Каратманово.
– До крајот на минатата година предадов еден тон тутун. Деновиве ќе предадам уште 500 килограми. Субвенции денес зедов за првите, а верувам дека во најсоро време ќе земам и за вторите,рече Наков.
Во велешко од ланската реколта на откупните пунктови на компаниите „Алијанса“, „Соцомак“ и другите се откупени над 1.500 тони квалитетен тутун со просеча цена од 154 денари за килограм.
– Во просек килограм тутун ми беше откупен по 162 денари. Со субвенцијата од едно евро за килограм сум презадоволен. Произведов и предадов 1,7 тони тутун. Еве сега ги подигам парите за субвенциите, рече земјоделецот Енвер Неџипи од селото Бузалково.
Лани околу 2.000 семејства садеа тутун во велешко на 1.030 хектари во општините Велес, Чашка, Градско и Лозово. Сега се очекува откуп на уште 300 тони.