Судијата Лазаров и ја предаде претседателската функција на судијката Петровска
Пензионираниот судија Јордан Лазаров и ја предаде должноста претседател на судијката Валентина Петровска. Тоа се случи денеска. Клучевите, архивата, надлежностите и грижата за вработените во куќата на правдата во Велес сега ги има Петровска која функцијата вршител на должност претседател ќе ја извршува се додека не биде избран нов во овој основен суд, со проширена надлежност.
Двајцата судии и во исто време функционери примопредавањето го направиле рано утринава, во канцеларија, штом стигнало решението на Судскиот совет со кое досегашниот заменик претседател бил именуван за претседател на Основниот суд во Велес.
– Немаше ништо посебно или специјално. Тоа е вообичаена и рутинска работа. И предадов се на судијката Петровска и од неа побарав да продолжи да раководи со институцијата, да работи како и досега и да се грижи за реномето на судот и квалитетот на работа, рече досегашниот претседател Јордан Лазаров.
Тој заминува во пензија откако три децении работеше како судија и во два наврати беше именуван за прв велешки судија. Претходно Лазаров беше вработен во Секторот за внатрешни работи во Велес како инспектор за стопански криминал. Судијскиот работен стаж го стекна во одделот за стопански и граѓански работи. Додека беше судија неговата работа беше оценета за успешна и беше во категоријата на најдобрите судии во Македонија./Б.Н