25 евра за непрописно преминување на улица изнесува казната што ќе ја напише полицаецот
Црвен картон за несовесните, зелен за пешаците кои ги почитуваат сообраќајните правила и прописи. Велешани денеска на тест пред полицијата, колку се грижат за својата безбедност додека преминуваат улица. Поголем дел од нив добија зелен картон, но имаше и такви кои добија црвени оти ја претрчуваа улицата недалеку од обележаното место за пешаци.
„Добив црвен картон од полицаецот, оти не преминав на пешачки премин. Отсега повеќе ќе внимавам бидејќи тоа е за мојата безбедност во сообраќајот.
„За жал брзав и поминав преку улица но не на печашки премин. Сега се каам затоа што полицаецот ме предупреди и ми даде црвен картон. Во иднина ќе внимавам каде преминувам.
„Ова е многу добра акција. Треба да ги почитуваме сообраќајните правила ако сакаме да бидеме безбедни во сообраќајот. Од намлади до најстари а ние постарите треба да им бидеме пример на помладите.
„Секогаш поминувам на пешачки премин, бидејќи така се чувствувам посигурно,“ рекоа граѓаните кои беа набљудувани од полицајците.
Со црвен картон полицијата денеска ги предупредуваше пешаците затоа што ја загрозуваат својата безбедност. Зелен им делеше на оние кои ги почитуваат сообраќајните правила и преминуваа на пешаки премин. Акцијата за безбедност на пешаците се спроведуваше во центарот на градот и пред Гимназијата.
Со оваа акција СВР Велес во соработка со Републичкиот совет за сигурност на патниот сообраќај ги едуцира граѓаните дека нивната безбедност е најголема кога улицата ја преминуваат на пешачки премин и се движат по тротоар.
„Најголем дел од граѓаните се однесуваат коректно и имаат сообраќајна култура. Има исклучоци но сепак мислам дека состојбата во градот со почитување на сообраќајните правила од страна на граѓаните е на високо ниво, рече Тодор Атанасовски, СВР Велес.
Непочитувачите на сообраќајните правила завршуваат со парични казни. Оние што нема да ја преминат улицата на пешачки премин ќе платат 25 евра. Инаку по вина на пешаците на годишно ниво во земјава се случуваат 200 сообраќајни незгоди, а животот го губат дури 40 пешаци.
Но, дел од велешани кои денеска од страна ја следеа едукативната контрола на полицијата коментираа дека најголем дел од сообраќајната сигнализација на асвалтот е избледена, треба да се обнови и неа освен пешаците да ја почитуваат и возачите. Не секој возач дава предимство на пешак на пешачки премин, коментираа граѓаните./Д.С