Велешките средношколци се свесни за аерозагадувањето во градот, ќе подготвуваат иницијативи за чист воздух

Дваесет средношколци, денеска во велешкиот Младински центар, беа дел од првата едукативна работилница на теми за аерозагадување, кои се причинителите, кои се загадувачките супстанци но и кои се мерките за да се справиме со аерозагадувањето. За време на едукативната работлница младите велешани имаа прилика да се запознаат со правните механизми во државата коишто функционираат со цел да влијаат врз локалната самоуправа за што подобро спроведување на плановите за квалитет на амбиентниот воздух за Велес и имплементација на мерки за намалување на аерозагадувањето.

-Ова е почетна работлница, нашиот проект трае до месец Јули и ќе имаме уште три работни сесии на коишто конкретно ќе работиме со овие млади луѓе на иницијативи. За град Велес треба да произлезат пет иницијативи коишто ќе бидат доставени до општината и градоначалникот ќе треба да се обврзе да ги реализира во одреден временски период. Ја сум презадоволна бидејќи гледам многу млади заинтересирани луѓе, имаме добра основа за да учиме нови работи. Младите кои се присутни се свесни за аерозагадувањето како и за причините. Има интерес и желба да се делува да се промени нешто како и желба да се работи бидејќи активно се вклучени, рече Бојана Станојевска Пецуровска Претседателка на Центар за климатски промени.

Таа додаде дека од Велес ќе треба да бидат вклучени 15 млади луѓе но напомена дека бројот треба да расте и испрати апел до сите заинтересирани да станат дел групата на млади луѓе насочени кон промени во локалната заедница.

Денешната работилница е во рамки на проектот „Младинска акција за чист воздух“  којшто го спроведува Центар за климатски промени во партнерство со УНИЦЕФ и е финансиран од Владата на Шведкса. Истата ќе биде спроведена и во Кавадарци, Куманово, Гостивар и Скопје.

Стефани Манева