Златен јубилеј на ОУРЦ „Маца Овчарова“ Велес: „Секоја цел во животот и во професијата е остварлива особено ако е хумана и благородна“ (фото и видео)
![](https://duma.mk/wp-content/uploads/2023/03/Untitled-design-2023-03-22T134344.092.png)
Со издадена монографија „50 години раст и развој низ лавиринтот на детскиот свет“, организирана културно уметничка програма, ликовна и изложба на изодениот пет децениски развој, вчера вечер, ОУРЦ „Маца Овчарова“ го одбележа пет деценискиот јубилеј. Вредниот и професионален работен колектив кој постоел и постои за да ги совлада сите детски бариери и од учениците да создава општокорисни граѓани на локалната заедница уште еднаш докажа дека за него нема друга цел освен работа со посебни, уникатни, среќни ученици и нивни родители.
![](https://duma.mk/wp-content/uploads/2023/03/maca-so-logo-direktorka.png)
„Низ изминатите 50 години, професионално и одговорно, секогаш до и покрај учениците ги едуцираме, воспитуваме и рехабилитираме. Ги подготвуваме на патот на зрелоста и иднината да бидат рамноправни членови во локалната и пошироката заедница. Упорноста, ентузијазмот и амбициозноста на наставниците, дефектолозите, специјалните едукатори и рехабилитатори, стручните соработници, воспитувачите, негувателите заедно со севкупниот кадар на училиштето започнува со самото негово формирање во далечната 1973 година. Тоа трае до денеска и ќе продолжи да трае во годините кои следат. Лично сум горда што сум дел од севкупниот успех и ентузијазам којшто постојат во училиштето, рече директорката м-р Мирјана Петрушевска.
![](https://duma.mk/wp-content/uploads/2023/03/maca-so-logo-8.png)
![](https://duma.mk/wp-content/uploads/2023/03/maca-so-logo-7.png)
Таа за вака успешната приказна се заблагодари и на родителите на учениците како и на сите досегашни соработници на училиштето. Исто така во името на работниот колектив Петрушевска постхумно им додели Благодарници на основачите на ПОУ„Маца Овчарова“ и ги врати сеќавањата на велешани на личностите како што се првата директорка Мира Величкова, Ангел Љутков, Ѓоре Поп Стефанов, Орце Ржаров, проф. Д-р Љупчо Ајдински, проф д-р Славчо Ќерамитчиев и единствениот жив меѓу нив Борис Митев.
![](https://duma.mk/wp-content/uploads/2023/03/maca-so-logo-2.png)
Особено интересено беше искажувањето на поранешниот ученик Јован Андов со кого училиштето и денеска се гордее, како и на неговата мајка Лидија Андова.
Специјалниот едукатор и рехабилитатор Марија Давчевска пред присутните на свеченоста ја промовираше монографија „50 години раст и развој низ лавиринтот на детскиот свет“, што ја уреди Соња Гаврилова со уредувачкиот одбор составен од Мирјана Петрушевска, Марија Давчевска и Татјана Попова.
![](https://duma.mk/wp-content/uploads/2023/03/maca-so-logo-1.png)
Во културно уметничката програма присутните имаа можност да ги запознаат сите ученици на ОУРЦ „Маца Овчарова“ во заедничките настапи со Балетско студио „Анабела“, Хорот на ООУ„Блаже Конески“, ОМУ„Стефан Гајдов“ и актерите на велешки Театар ЈКХ „Џинот“. Како и во настапите со гостите од КУД „Стоби“ Градско и Фолклорен Ансамбл на образовни асистенти од Кавадарци. Златниот јубилеј беше отворен со изведбите со изведбите на македонската и химната на Велес од страна на Младински црковен хор „Свети Кирил и Методиј“.
Убавка Јаневска
фото:
![](https://duma.mk/wp-content/uploads/2023/03/maca-so-logo-hor-blaze.png)
![](https://duma.mk/wp-content/uploads/2023/03/maca-so-logo-4.png)
![](https://duma.mk/wp-content/uploads/2023/03/Untitled-design-2023-03-22T110356.851.png)
![](https://duma.mk/wp-content/uploads/2021/05/SEMM.jpg)