Ќе има летови за Нова Година, штрајкот на контролорите ставен во мирување

Струковиот Синдикат на контролорите на летање денеска одлучи да го откаже најавениот штрајк на контролорите за 25-ти и 31-ви декември. Како што кажа Едмонд Каличи од овој синдикат, штрајкот е во мирување поради две причини.

-Едната е да се види начинот на селекција на вработување на овој конкурс. Другата причина е каде што имаме осум студенти контролори, на кои што се уште не им е продолжен договорот. Третата причина е дека имаме полно луѓе што живеат во странство и туристи кои што сакаат да ја посетат земјава. За понатаму ќе видиме како ќе се реализира ситуацијата околу контролорите на летаање, осумте студенти и процесот на вработување на кандидатите на конкурсот, рече претставникот во изјава за медиумите.

Претседателот на ССК, Александар Тасевски изјави дека ќе го следат конкурсот и ќе бидат дел од самата селекција. Ќе ги набљудуваат постапките на селекција и дали ќе има неправилности.

-Главната болка ни се кадрите кои што се примаат без никакви селекции, туку врз основа на поднесена документација. Нема тестирање, нема привремени рокови за обука и проверка на нивното работно место, кажа денес Тасевски.

На средбата пред два дена, министерот за транспорт и врски, Благој Бочварски побара од Синдикатот да не ја спроведуваат одлуката за прекин со работа од причина како што објасни министерот, административните постапки во М-НАВ не смеат да влијаат во професионалноста на Друштвото во насока на нормалното одвивање на ависообраќајот во земјава.

Ова следуваше како реакција на објавени огласи за вработувања во М-НАВ, со критериуми, според Тасевски, спротивни на постигнатата спогодба со менаџментот од октомври годинава.

Дума.мк