Сопственик на кафетерија и фабрика од Охрид испрати 140 вработени на одмор во Турција, на негов трошок

14.09.2020

–ИТ кафе затворено заедно со уште еден ресторан. Причина? Епа газдата на тие 2 објекти и на уште една фабрика им уплати на вработените (140 на број) одмор во Турција Ultra all Inclusive. Многу од нив прв пат се качија во авион,пишува на Твитер.

На фејсбук-профилот на овој објект на 11 септември е споделена објава која гласи дека периодов ИТ кафе нема да работи поради колективен одмор на вработените.

Газдата е Новко Плаќаноски, стружанец со бизнис во Охрид. Тука му е фирмата, кафулето и ресторанот.  Летната сезона се уште не е завршена, но двата негови угостителски објекти се затворени – вработените се на одмор. Тој досега неколкупати неговите вработени ги частел одмор, но најинтересно е сега, во услови на пандемија кога на газдите им е полесно да отпуштаат, сопственикот на „ПН Метал“, ресторанот „Валентино“ и кафулето „ИТ“,  вработените со чартер лет ги испрати на одмор во Анталија, Турција, објави ММС.

Кога од ММС му се јавиле и му кажале дека сакаат да го пофалат нему му паднало незгодно, им рекол дека не сака да се експонира, бидејќи не направил ништо посебно.

-Јас не направив ништо посебно. Заминаа на заслужен одмор. Нема ништо чудно.  Не е прв пат. Биле на одмор на места од екс Југославија, во Бугарија и во Македонија, но сега е прв пат да заминат подалеку. Заминаа на 12ти, пред неколку дена 126 вработени. Секако во фирмата се многу повеќе вработени, но поради семејни причини некои не можеа, а и со чартер летот толку можеа. Ова е еден вид заслуга, на некој начин. Нема потреба од никаква идеја овде, ниту, пак, дека јас сум направил нешто посебно. Едноставно треба да му се каже „фала“ на работникот. Ние сме еден вид семејство, така се однесувам со нив. Ние сите сме исти, луѓе сме. Газдата без работник не може никогаш  да опстане, а и обратно, работниците не можат без газда. А кога сме веќе така поврзани убаво е да се почитуваме. Не е само одмор,  се помагаме за се, за свадби, за раѓање, за недај Боже. Се она што може да се помогне се помага. Ќерка ми работи со мене, таа е дел од тимот, а другата е уште во школо.  Фирмата се занимава со производство на шпорети, семејна фирма е по татко, по дедо. Платите не доцнат. Ако мене ми е убаво и ним треба да им е. Сметам дека работата за сите треба да е свето нешто, но според начинот на кој живееме денес, вработените се супер. Пак ќе речам, луѓе сме сите, нема ништо чудно во ова, рече Новко Плаќаноски за mms.mk и додаде:

„Ве молам не ме фалете толку, јас сум само човек“.

И така би требало да биде, но кај нас не е. За жал…

Извор и фото: ММС