Грција ќе помага во интеграцијата на македонската армија во НАТО структурите
19.04.2021
Со програмата за билатерална воена соработка за 2021 година потпишана меѓу С. Македонија и Грција, ќе дојде до помош и поддршка за прашањата поврзани со интеграција на армијата на Северна Македонија во НАТО структурите.
„Со потпишувањето на конкретната програма дополнително се надградува воената соработка и интероперабилноста меѓу вооружените сили на двете земји со спроведување како на заеднички вежби, така и оперативни активности. Во исто време, се истакнува клучната улога на Грција во брзата и ефикасна интеграција на соседната земја во механизмите на Алијансата, факт што ги промовира безбедноста и стабилноста во поширокиот регион на Балканот, соопштуваат од Генералштабот на грчката армија за потпишаната програма“, јавува дописничката на МИА од Атина.
Со оваа помош се вклучени прашањата поврзани со интеграција на армијата на Северна Македонија во структурите на Алијансата, вклучува прашања за едукација и обука во грчки воени институции и школи на трите сектори на вооружените сили, обезбедување на специјализирана обука во неколку центри како што е Мултинационалниот тренинг центар за поддршка на мировни операции и Центарот за воздушна и ракетна одбрана.