МЖСП ја стартува програмата „ЕУ за чист воздух“ вредна 10 милиони евра

Во присуство на Каја Шукова, министерка за животна средина и просторно планирање и битолскиот градоначалник Тони Коњановски, денеска во Јуроп Хаус Битола, шефот на делегацијата на Европската унија, амбасадорот Дејвид Гир и Микела Телатин, директорка на канцеларијата на УНОПС за Македонија со церемонија на потпишување ќе ја започнат програмата „ЕУ за чист воздух“.

Делегацијата на ЕУ, информираше за целта на Програмата „ЕУ за чист воздух“ која се очекува да придонесе за намалување на емисиите на загадувачи и честички во Битола, Куманово, Скопје и во Тетово, со што ќе се подобри квалитетот на воздухот во земјава. Од министерството се посочува дека 794 540 жители од четирите урбани центри директно ќе имаат придобивка од: подобрените системи за греење во 70 јавни згради со површина од 200.000 м2, испораката и инсталирањето на три станици за следење на квалитетот на воздухот и засадувањето на 6.000 садници дрвја.

Само главниот град, се наведува, ќе добие шест еколошки автобуси за јавен превоз и ќе биде предмет на физибилити студија за натамошно проширување на Системот за централно греење во Скопје.

Програмата „ЕУ за чист воздух“ произлегува од Европскиот зелен договор и целта Европа да стане првиот климатски неутрален континент до 2050 година. Буџетот од 10 милиони евра ќе се спроведува во период од три години (до 2026 година) под раководство на УНОПС, се наведува во соопштението. 

Дума.мк