Пендаровски со ордени постхумно ќе ги одликува Крсте Црвенковски и Невена Георгиева-Дуња
![](https://duma.mk/wp-content/uploads/2022/07/vila-vodno-stevo-pendarovski-voen-orkestar-makedonsko-zname-2-960x640-1.jpg)
По повод чествувањето на државниот празник 2 Август, Илинден – Денот на Републиката под покровителство на претседателот Стево Пендаровски се предвидени повеќе активности, а централната манифестација ќе се одржи на платото во Кабинетот на шефот на државата.
-Со почеток во 09:00 часот, на платото во Кабинетот на претседателот ќе се одржи централна манифестација, на која ќе се обрати претседателот Пендаровски и ќе бидат доделени одликувањата Орден на Република Северна Македонија, Орден за воени заслуги и Медал за храброст. Со Орден на Република Северна Македонија, постхумно ќе биде одликуван Крсте Црвенковски, за својот особен, стратешки, долготраен и неповторлив придонес во втемелувањето и во развојот на македонската држава и на македонското општество, велат од Кабинетот на Пендаровски.
Со Орден за воени заслуги, постхумно ќе биде одликувана Невена Николова Георгиева – Дуња, за извонредната храброст, пожртвуваноста, непоколебливоста и за лидерската улога во антифашистичката борба во работничките и во синдикалните движења, коишто се застапувале за социјална правда, со што ја задолжи нашата држава со своето херојско дело и со својот пример за посветеност на заедничката цел и на заедничката борба за подобар и поправеден свет.
-Со Медал за храброст ќе бидат одликувани: Никола Стојановски, Јован Величковски, Трајанка Аврамовска (постхумно), Илија Дуновски, Никола Николоски, Цветко Цветкоски, Кадрија Џафери и Дaфинка Богоева. Осуммината се одликуваат за пожртвуваноста, за истрајната борбеност и за животната посветеност на високите цели на заедницата, како и за целокупниот влог во Народноослободителната борба, што се согледува низ нивните карактеристики, а и низ карактеристиките на голем број генерации борци, кои не ги штедеа своите животи за слободата, втемелувајќи ги основните насоки за градење на државата, соопштуваат од Кабинетот на претседателот.
Централната манифестација ќе биде директно пренесувана на Јавниот сервис МРТ, на Facebook страницата на Претседателот и на YouTube каналот.
![](https://duma.mk/wp-content/uploads/2021/05/SEMM.jpg)