Атлетичарот Роберто Димитриевски трет на 11-тата Дедомразовска трка во Скопје
Објавено: 29 декември, 2025, во 15:28 часот
Во пресрет на Новогодишните празници атлетичар Роберто Димитриевски, член на АК „ВЕЛЕС“ од Велес, вчера учествуваше на традиционалната 11-тата забавна „Дедомразовска трка“ во центарот на Скопје. Во конкуренција од над 1.000 атлетичари и рекреативци од земјава, поединци и цели семејства како и во задолжителен дедомразовски костум, Роберто и годинава го освои третото место. Велешанецот е добитник и на статуетката Дедо Мраз како и на медал што го добија најдобрите тројца натпреварувачи во машка, во женска и во детска конкуренција.
Димитриевски за читателите на Дума.мк сподели информации за трката во која максимално се вложил но сепак на крајот, пред целта, се случило мало попречување од публиката и тоа невнимание го чинело оддалечување од победничкото, прво место.
-Воедно им порачувам на сите без разлика на возраста да спортуваат, барем рекреативно доколку сакаат да бидат здрави. „Во здраво тело, здрав дух“. Здравјето е најважно и затоа мора да редовно да се спортува, порача Димитриевски.
Овој млад велешки атлетичар во 2025 година учествуваше на многу трки во земјава и беше секогаш меѓу првите. Затоа и севкупно со бодување од сите градски трки во Македонија го освои третото место, во силна конкуреција, на Првата Атлетска тркачка лига 2025. Секако успехот е резултат на истрчани 13 атлетски трки а меѓу нив и велешката „Трчаме за Рацин“ кога беше прв на целтта.
Димитриевски, во новата година, има многу планови за учество на домашни и меѓународни трки, но вели „затоа – потоа, прво истрчај и постигни резултатите па тие нека бидат потврда на тоа што напорно си го сработил“.
Во пресрет на новите трки, Димитриевски, секојдневно и сега, во зима, по два пати напорно тренира и се подготвува на бехатон патеката во Градскиот парк. Таа според него, атлетичарите и некои рекреативци напорна е за трчање. Затоа овој млад велешанец, во свое и име на сите спортисти и рекреативци од Велес, апелира до локалната власт конечно да го исполни даденото ветување за целосна реконструкција на руинираната атлетска патека на Градскиот фудбалски стадион „Зоран Паунов“ во Велес.
Убавка Јаневска