Пуштен во употреба пешачкиот мост преку битолска пруга
По пешачкиот надвозник над битолска пруга од денеска можат да минуваат сите граѓани кои од новиот дел на градот побрзо ке можат да стигнуваат до зградата на општината, до подрачните единици на министерствата, железничката станица и претпријатијата во тој дел од Велес.
Мостот го осветија свештеници на Епархијата Повардарска а први по него поминаа градоначалникот, претседателот на Советот на општината, советничката група на ВМРО ДПМНЕ со коалициските партнери како и двајцата пратениците од власта.
Мостот започна да се гради лани на денот на општината, 9-ти Ноември, од страна на градежната фирма „Урбан Инвест“ а железната конструкција со патеката, долга 23 метри, ги изработи фирмата „11-ти Октомври “. Велешани добија нов мост изграден според сите стандарди, рече на свеченоста градоначалникот Чадиев.
– Проектот чини 3,8 милиони денари. Конструкција изнесува 3, 1 милиони денари а за хортикултурното уредување, од двете страни на мостот, беа предвидени 700 илади денари. Го изградивме поради тоа што граѓаните од овој регион го посочија како неопходен приоритет. Овој дел од градот доби ефективен и квалитетен систем на пешачки сообраќај, рече Славчо Чадиев.
Општината планира да направи измени во ДУП за тој дел на градот и да овозможи на парцела во близина на пешачкиот мост да се гради помал стамбен објект. Локацијата се наоѓа од страната на зградата на општината поточно до битолска пруга и непосредно до пешачкиот мост. Таму согласно законот ќе се отстранат времените објекти. Станува збор за десеттина гаражи.
– Согласно урбанистичкиот план, во план сме во наредниот период да дадеме на лицитација помала парцела, во овој дел, за изградба на помала станбена зграда со 6 ката, рече Чадиев.
Во исто време општината планира, истиот простор, хортикултурно да го доуреди и да постави урбана опрема.