Власта подготвува уште еден ребаланс на Буџетот на општината, се сомнева опозицијата
Објавено: 25 октомври, 2013, во 18:24 часот
Локалната власт ги крати програмите за работа на општината а тоа значи дека подготвува уште еден ребаланс на буџетот, информираше Благој Коларов. Координаторот на советничката група на опозицијатa, побарал на координативната средба, до крајот на месец Октомври да се одржи седница на која ќе се разговара за ребалансот на буџетот бидејќи забележиле дека се кратат средства за проекти со краен рок декември 2013-та година.
– Потценувачки е локалната самоуправа да ги повикува граѓаните да учествуваат на јавни расправи на кои можат да предложат проекти за работа на општината во идната година а да не им кажува дека многу проекти планирани за годинава нема да се реализираат, рече Коларов.
За власта, јавните расправи по нацрт програмите за работа на општината се пример за транспарентност. Граѓаните се запознавале за што се се трошат нивните пари.
– Имавме голем интерес. Пет часа се одржуваа расправите по нацрт програмите и граѓаните сега имаат увид во тоа што ќе работи општината во наредната година,рече градоначалникот Славчо Чадиев.
СДСМ не мисли така и се сомнева во искреноста на власта. Опозицијата смета дека на иста седница ќе се носи ребаланс на буџетот и ќе се расправа за програмите за работа во 2014-та. Затоа бара овие точки поединечно да се стават на дневен ред на две седници.
