Велес, вечерва и утре, го слави делото на заштитникот на градот, Свети Пантелејмон

Велешани вечерва масовно ќе го посетат велелепниот соборен храм кој го носи името на заштитникот на градот. Соборната црква „Свети Великомаченик Пантелејмон“, изградена од најголемиот македонски неимар и градител Андреја Дамјанов, ќе ги отвори ширум вратите за верниците кои палат свеќи и искажуваат почит кон делото на светецот. Така ќе му се заблагодарат на Свети Пантелејмон, кој во земниот живот бил лекар, и успеал градот да го спаси од чума. Во чест на неговото дело во 1840 година е изградена црквата на ридот на десната страна во Велес.

Вечерва чествувањето посветено на светителот ќе започне со празнична богослужба во соборниот храм со која ќе чиноначалствува Митрополитот Повардарски г-дин Агатангел во сослужение со свештениците од Повардарската Епархија.

Потоа во дворот на црквата ќе настапи градскиот црковен хор „Свети Кирил и Методиј“.

Верниците ќе го проследат и играно документарниот филм „Македонска миланска скала“  авторски проект на Данчо Стефков посветен на црквата Свети Великомаченик Пантелејмон. Во филмот улогата на Андреја Дамјанов ја игра актерот Јордан Витанов. Во филмот е користена авторска музика на композиторот Марјан Неќак. Филмот е во продукција на ТВ Здравкин.

Годинешното чествување се случува на 200 годишнината од раѓањето на Андреја Дамјанов./Б.Н

Погледнете го филмот:

{youtube}http://www.youtube.com/watch?v=EkQYkYyFTfU{/youtube}