Градоначалникот на Кавадарци обвинува за политичка хајка против него

Градоначалникот на Кавадарци, Александар Панов се жали дека против него актуелната власт спроведува политичка хајка. Смета дека никогаш не било полошо од сега.

„ Не поради тоа што јас сум во прашање. Прво беа обидите преку ‘бомбите’ во негативно светло да се прикаже мојата личност. Тука е и секојдневно гребење на автомобилот и одвртување на штрафовите на гумите, иако автомобилот не е само мој туку во него се вози целата моја фамилија. Тука се и кривичните пријави кон мене и мојата сопруга. Еден масовен атак. Создаваат една слика како да сме душмани, а не само политички противници “, вели Панов и нагласува дека сегашната борба била средновековна.

Градоначалникот Панов се осврна и на пресудата на кавадаречкиот суд, со која е осуден на два месеца затвор поради изборен поткуп. Рече дека ако судијата Лазар Нанев во следниот период бил награден со повисока позиција,  ќе значело дека пресудата била за тоа, а доколку не добиел награда, пресудата била донесена како што треба.

На своите политички противници Панов им порача да излезат пред граѓаните со своја визија за Кавадарци и нови проекти, и да престанат со црната кампања против него. Доказ дека мислат добро на граѓаните, според него е изградба на нов мост во Ваташа, кој иако бил проект на претходната власт, сега тие треба да направат се’, за да се реализира./A.Д