Вакцините против ковид-19 немаат штетни последици врз мајките и врз нивните бебиња

Tврдењето дека „бебињата на вакцинираните родители се раѓаат без белиот дел од окото“ се неточни. На интернет се прошири ваква дезинформација преку објавување видео од бебе во болница, кое е предвреме родено. Меѓутоа, мајката на бебето, за странски проверувачи на факти изјави дека не само што не се вакцинирала, туку дека нејзиното бебе е родено предвреме и можеби затоа изгледа така, односно има побавен развој, меѓутоа дека има вообичаена генетика и ништо кај бебето не е „трансхумано” како што лажно се тврди на интернет и во објавата што ја рецензираме

Рецензираме пост објавен на социјалната мрежа Фејсбук, а кој се однесува на вакцинацијата против ковид-19 кај бремените жени и жените кои се породиле. Во постот се изнесени загрижувачки, но невистинити тврдења, кои можат негативно да влијаат на вакциналната кампања која трае во С.Македонија, а во која жените кои се бремени или дојат се препорачува да примат трета доза вакцина.

Во постот што го рецензираме се тврди дека жените кои се бремени, а примиле вакцина, раѓаат бебиња со ниска родилна тежина, имаат спонтани абортуси или умираат.

Понатаму, се тврди дека вакцинираните парови имаат црнооки бебиња и дека кај тие парови што се вакцинирани, пред да зачне мајката, се раѓаат „бебиња со тотално поинакви карактеристики од нормалните човечки суштества, што се нарекува трансхуманизам”.И што гледаме? Деца родени без конјунктива. Тоа е белиот дел од окото. Два часа по раѓањето, тие веќе ја држат главата. Две недели по раѓањето, тие веќе стојат. На два месеци пешачат. Сето ова е тотално ненормално. Ова е во случај да сте биле инокулирани пред зачнувањето. Кога се инокулирале за време на бременоста, сме виделе 6000 проценти повеќе абортуси бидејќи се создава згрутчување од овој отров во циркулаторниот систем. Плацентата и папочната врвца се еминентно васкуларни органи. Значи, ако се создаде згрутчување, протокот на мајчината крв што се храни низ плацентата и поминува низ папочната врвца до бебето може да коагулира. Ако таму има згрутчување, количината на крв што стигнува до бебето очигледно се намалува. И тогаш имаме бебиња кои умираат. Големото мнозинство од нив, се вели во постот што го рецензираме.

Ова тврдење ѝ се атрибуира на извесна докторка Вивиен Брунет која исто така додава, дека „други бебиња се раѓаат со многу мала родилна тежина во зависност од нивната гестациска возраст”.Имаме бебиња од 39 до 40 недели, на крајот од бременоста, кои се раѓаат со кило и пол тежина. Има намалување на амнионската течност, која е средина што го штити бебето од промени, температура, шокови итн. Има намалување. И фетусот со олигохидрамнион не може да преживее. Тоа е да се каже, не може да преживее со мала количина на плодова вода во абдоменот на мајчината матка. Имаме смртни случаи на трудници. И, очигледно, со смртта на пациентот, ќе има и смрт на производот на зачнувањето. Значи, јас сум тотално против инокулација на овие погрешно именувани вакцини кај целата популација. Но, особено кај бремените и кај децата, се додава во постот што го рецензираме.

Во однос на тврдењето дека „бебињата на вакцинираните родители се раѓаат без белиот дел од окото“, оценуваме дека станува збор за комплетна невистина. На интернет се прошири ваква дезинформација, преку објавување видео од бебе во болница, кое е предвреме родено. Меѓутоа, мајката на бебето, за странски проверувачи на факти, изјави дека не само што не се вакцинирала, туку дека нејзиното бебе е родено предвреме и можеби затоа изгледа така, односно има побавен развој, меѓутоа дека има вообичаена генетика и ништо кај бебето не е „трансхумано” како што лажно се тврди на интернет и во постот што го рецензираме.

Мајката за „Ројтерс“ додава дека бебето е родено во август 2020 година, кога воопшто не беше почната вакцинацијата.

Моето бебе е многу здраво бебе. Не ја примив вакцината додека бев бремена затоа што тогаш не беше достапна, но ја примив неколку месеци подоцна, изјавува таа за Ројтерс.

Комплетно невистинито е тврдењето во постот дека бебиња од вакцинирани родители имаат поинакви карактеристики од нормалните човечки суштества, што се нарекува трансхуманизам.

Центарот за контрола и превенција на болести на САД, Американскиот колеџ за гинекологија и акушерство и Асоцијацијата за мајчинско фетална медицина, препорачуваат бремените жени да се вакцинираат против ковид-19.

Што велат стручните лица од Клиниката за гинекологија и акушерство во земјава? 

Стручниот колегиум на Универзитетската клиника за гинекологија и акушерство Скопје (ГАК), Комитетот за безбедно мајчинство на РСМ и Здружението на перинатолози на РСМ издаде препораки во врска со вакцинацијата против ковид-19 за време на бременост. Овие препораки кои ги доби „Вистиномер,“ биле испратени и до Лекарската комора и се базирани врз студии од светски релевантни медицински институти што се темелат на истражувања во кои се опфатени сериозен број испитаници од оваа категорија на женската популација.

Според овие препораки, вакцинацијата против ковид-19 се препорачува во бременоста, исто како и кај останатиот дел од популацијата. Вакцинацијата е најдобар начин на заштита од штетните ефекти на ковид-19 во бременоста, како за мајката така и за нејзиното бебе, вклучувајќи го предвременото породување и престојот во единицата за интензивна нега на новороденчето.

Придобивка од вакцинацијата против ковид-19 во бременоста, според овие препораки, е намалување на ризикот од тешка форма на болеста кај мајката, намалување на ризикот од спонтан абортус и предвремено породување, како и намалување на ризикот од трансмисија на вирусот кај членовите од семејството и околината.

Досегашните достапни податоци на преку 140 илјади вакцинирани бремени жени, укажуваат дека трудниците кои се вакцинирани против ковид-19 немаат зголемен ризик од лош исход од бременоста, спонтан абортус, предвремено породување, мртов плод, недоволно растење на плодот или пак вродени аномалии, што е една од причините која ни дава за право да препорачаме вакцинација против ковид-19 кај бремените жени, велат од ГАК за „Вистиномер“. 

Доколку пациентката прими прва доза на вакцина без да знае дека е бремена, од ГАК препорачуват втората доза да биде примена по 8 недели, без разлика на конкретната гестациска недела, затоа што релевантни медицински сознанија укажуваат на тоа дека вакцината е безбедна и ефикасна во било која фаза од бременоста и не постои причина за пролонгирање на примањето на втората доза.

Од ГАК препорачуваат вакцинација за бремените жени и за доилките со мРНК вакцина, а не со вакцина базирана на жив вирус.

Најновите студии покажуваат дека заштитните антитела кои се придобивка од вакцинацијата ја поминуваат постелката и овозможуваат создавање на имунитет на плодот против ковид-19 наспроти штетните ефекти кои болеста ги има кај трудниците особено во третиот триместар, што е уште една добра причина да препорачаме вакцинација против ковид-19 во бременоста, се вели во писмените препораки на македонските гинеколози. 

Оттаму додаваат дека во врска со можните штетни ефекти од вакцинацијата, не се најдени податоци за штетни состојки во вакцината кои можат да ѝ наштетат на трудницата и на развојот на нејзиниот плод, ниту пак можат да предизвикаат акутна ковид инфекција.

Несаканите ефекти од вакцинацијата против ковид-19 во бременоста се благи, не траат долго и се слични со оние како кај останатото вакцинирано население. Тука се вклучуваат појавата на болка и осетливост во пределот на раката, главоболка, замор, некогаш симптоми слични на грип или покачена температура, во кои случаи препорачуваме одмор, внес на течности и „парацетамол“ кој е безбеден во бременоста, додаваат оттаму.

И Комисијата за заштита на населението од заразни болести препорача бремените жени да се вакцинираат и да се вратат на работните места.

Институтот за јавно здравје на својата веб страница официјално препорача да се вакцинираат бремените жени.

Податоците од системите за  следење на безбедност не откриваат никакви грижи и сомнежи за жени кои примиле mRNA вакцина против ковид-19 доцна во бременоста или сомнежи во однос на здравјето на нивните бебиња.

Научниците не откриле зголемен ризик за спонтан абортус кај жените кои примиле вакцина против mRNA ковид-19 непоосредно пред и за време на раната бременост (пред 20-та недела од бременоста).

Во врска со штетните ефекти од вакцинацијата сакаме да потенцираме дека досега не се пронајдени податоци за штетни состојки кои би можеле да ѝ наштетат на бремената жена како и на нејзиниот плод, ниту пак можат да предизвикаат ковид-19 акутни инфекции, пишува во препораката на Институтот за јавно здравје. 

мРНК од вакцините не останува во човековото тело засекогаш, туку се разградува и телото се ослободува од него за најмногу 72 часа. Во земјава има вакцинирани жени кои се породиле и доколку нивните бебиња манифестирале поинакви „трансхуманистички” карактеристики, тоа ќе беше јавно објавено. Меѓутоа, вистината е дека вакцината на ниту еден начин не го оштетува плодот, бебето, ниту пак го прави „трансчовек“. За да се покаже лажна слика за спротивното, во постот што го рецензираме злоупотребена е фотографија од предвреме родено бебе од невакцинирана мајка.

Поради сите горенаведени факти, оценуваме дека постот што го рецензираме е невистинит.

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар