Смок отепаа граѓани во Дворови,се симнал на сокак од зеленилото покрај железничката пруга
Смокот долг, по слободна проценка, повеќе од еден метар го забележал граѓанин којшто живее во тесниот сокак под железничката пруга Велес – Штип. Тој ги тргнал децата кои играле пред своите куќи и побарал помош од мажите, соседи, кои заедно се обиделе да му пристапат и да го отепаат. Мажите со стапови се бранеле и мавале по смокот со цел да го погодат во пределот на главата. Во намерата сепак успеал еден од повозрасните мажи. Потоа го собрале од улицата „Благој Нечев“ и го фрлиле за да не се создава паника кај останатите соседи.
„Но, паника се создаде. Сега не ги пуштаме децата надвор од домовите и внимаваме како ние повозрасните се движиме по сокакот. Ги опоменуваме и сите кои го користат овој сокак за поминување до домовите. Сами во повеќе наврати ја чистевме тревата, жбуновите и нискостеблестите растенија покрај железничката пруга. Вегетацијата е бујна, не успеваме сами да спречиме таа повторно да расне. Не знаеме каде да се обратиме за помош,“ рече жител на сокакот.
„Нешто мора да се стори, не се чувствуваме безбедни ние а уште помалку нашите внуци. Ги предупредуваме и останатите граѓани да внимаваат или да не се движат по сокакот под железничката пруга Велес – Штип бидејќи слушаме шумови од под жбуновите кои ни будат сомнеж дека можеби во нив има змиски гнезда.Кажете ни каде да бараме помош, додаде жител на сокакот.
Просторот покрај железничките пруги е во надлежност на македонското јавно железничарско претпријатие. По оваа пруга, од Велес за Штип, одамна не поминуваат возови додека вегетацијата со години не се одржува. За ова претходно граѓаните барале да им помогне и општината од каде им одговарале дека не е во општинска надлежност.
Сепак кога пред три години змија се појави над малиот тунел, којшто се користи како влез во овој дел на населба Дворови, тогашната општинска еколошка инспекторка издаде наредба за расчистување на просторот во тој дел, од двете страни на железничката пруга, по што постапија комуналните работници на локалното јавно претпријатие. Пролазот освен жителите на Дворови го користат и ученици на музичкото училиште.
Убавка Јаневска