Празничен афористички поздрав од велешкиот афористичар Коки
Велешкиот афористичар Никола Бошков – Коки и овој понеделник издвои шест од своите афоризми за многу понеделнички насмевки. Уживајте:
-Можеби нашето електро стопанство ќе успее да обезбеди енергетска стабилност, ако освен струја, се определи да увезува ЕЛЕКТРИЧНИ ЕГУЛИ.
-Она што го имаат некои мажи, жените го имаат во малиот прст.
-Откако сообраќаецот ја запраша дали со себе ја носи задолжителната зимска опрема, таа започна да му ги покажува дебелиот џемпер, високите чевли и бундата.
-Многумина луѓе знаат многу повеќе што му недостига на својот автомобил отколку што им недостига во бракот.
-Вие отпрвин не ги плаќате некои жени за да воздивнуваат, туку отпосле, за да молчат.
-Постои можност во текот на мундијалот луѓето наполно да престанат да се интересираат за жените, освен ако овие не започнат масовно да играат фудбал.
Афористичар
Никола Бошков – Коки