Извидниците на државен натпревар во Голозинци

Сто извидници од одреди во Македонија ќе бидат учесници на државниот извиднички орјентационен натпревар што денеска почнува во Голозинци. Тие ќе се натпреваруваат во две категории поточно на помлади извидници и извидници. Станува збор за две натпреварувања РИОН, републички извиднички натпревар и РАПИ, републичка акција за помлади извидници.

Извидниците ќе се натпреваруваат во обострана топографија и орјектација во непознат терен додека помладите извидници во елементарни игри, полигонски натпревари, минимални основи на орјентација, игри за орјентирање на простор и во прва помош и сигнализација.

„Со организацијата на државниот натпевар како најстар извиднички одред во државата докажуваме дека имаме организациски и кадровски капацитет. Организатор на натпреварот е Сојузот на Извидници на Македонија а домакин одредот „Димитар Влахов“, рече старешината на натпреварот Ангелче Гушев.

Натпреварот го помогнаа бизнис заедницата и општините Велес и Чашка. Со него во исто време се промовира извидничкото движење кое од младите луѓе создава корисни граѓани во заедницата а тоа се постигнува преку основните принципи на скаутизмот или работа низ игра, обврска кон себе и кон другите.

„Компјутерите ги направија младите робови на технологијата. Ние сакаме да ги поттикнеме да излезат надвор од домот, да живеат и да се движат во природа,“ рече Гушев.

И покрај условите со кои располага извидничкиот дом во Голозинци, со капацитет од 100 легла, дел од извидниците учесници на натпреварот ќе ги постават шаторите и викендов ќе престојуваат во нив./Д.С