Пластеник во дворот на ООУ „Петре Поп Арсов“ во Извор – нова алатка за учење и развој кај децата

Учениците од Основното општинско училиште „Петре Поп Арсов“ во селото Извор отсега ќе имаат можност да учат преку практика, благодарение на новоизградениот пластеник во училишниот двор.

Со должина од 7 и ширина од 5 метри, опремен со систем за наводнување „капка по капка“, пластеникот претставува дел од проектот „Руралните убавини во Чашка“, финансиран од Министерството за животна средина и просторно планирање. Проектот се спроведува од страна на Организација на жените – Општина Велес, со цел поттикнување на одржлив развој во руралните средини.

Пластеникот ќе се користи како практична лабораторија за научно-образовни активности по предметите природни науки, биологија и општество. Покрај тоа, истиот ќе овозможи и нови воннаставни активности што ќе го збогатат секојдневието на децата во ова рурално подрачје.

-Создадовме простор каде децата не само што ќе учат, туку и ќе развиваат љубов кон природата и трудот. Веруваме дека ваквите активности го зајакнуваат чувството на заедништво и грижа за животната средина, – изјави Мирјана Трајкова од Организација на жените – Општина Велес.

Проектот „Руралните убавини во Чашка“ се реализира и во селото Горно Врановци, во соработка со ООУ „Лирија“, каде веќе се спроведени активности за хортикултурно уредување на училишните дворови, садење повеќегодишни садници и селекција на отпад.

Според организаторите, повеќегодишните растенија внесоа свежина во дворовите, а кај учениците предизвикаа насмевки и големо воодушевување.

Проектот е дел од Програмата за инвестирање во животна средина за 2025 година и има за цел да создаде долгорочни едукативни и еколошки бенефити за децата и заедниците во руралните подрачја на Општина Чашка.

Стефани Манева