Прегреал дел од локомотивата на патничкиот воз што наместо во Скопје, вчера, застана на станицата „Рајко“
Македонското железничарско претпријатие информираше за причината на дефектот што вчера се појави на локомотивата на патничкиот воз кој сообраќа на релација Скопје – Велес – Скопје, со поаѓање во 12:10 часот од Велес. Во одговорот на новинарските прашања на Дума.мк од Железници – транспорт потврдија дека се појавуваат потешкоти во одредени исклучителни случаи при појавување на моментални дефекти додека локомотивите се по пат.
„Конкретно, за предметната локомотива, извршен е дневен преглед пред вклучување во сообраќај. Локомотивата го изврши патувањето од Скопје до Велес без појава на дефект. При извршувањето на возењето од Велес кон Скопје, поради високите температури и намалената брзина поради условите на пругата, се појавило прегревање на еден од виталните делови на локомотивата и не можела да го продолжи патувањето,“ пишуваат од ЖРСМ.
Патници кои патуваа со патничкиот воз, вчера, и дојавија на редакцијата на Дума.мк дека наместо до крајната дестинација се возеле само половина час и стигнале до железничката станица „Рајко“ каде останале три часа се додека не стигнала друга локомотива. Тие се жалеа дека чекале на отворено, на жешкото време и високите температури.
Како што дознава Дума.мк минатата и оваа година енормно е опаднат бројот на патници кои патуваат со месечни возни билети и ги користат услугите на јавното железничарско претпријатие. Овој месец само седум патници извадиле месечен билет за патување со воз на релација Велес – Скопје – Велес за разлика од минатата година кога биле пет. Цената на месечниот билет за работници на релација Велес – Скопје и обратно, изнесува 2340 денари.
Убавка Јаневска